म्याड्रिड (एजेन्सी) – यो सिजन रियल मड्रिडका लागि पहिले भन्दा फरक हुने अनुमान गरिएको छ । कारण रियललाई लगातार च्याम्पियन्स लिग उपाधि दिलाउने प्रशिक्षक जिनादिन जिदेनले क्लबसँगको नाता तोडेको थिए । त्यति मात्र होइन क्लबका अहिले सम्मका सर्वाधिक गोलकर्ता पोर्चुजित स्टार क्रिस्टियानो रोनाल्डोले पनि ९ वर्ष लामो यात्रालाई टुंगाउँदै गत साता युभेन्ट्ससँग सम्झौता गरे ।

जिदानले क्लब छोडेपछि उनको ठाँउमा स्पेनिस राष्ट्रिय टोलीका पूर्व प्रशिक्षक जुलेन लोपेटेगुइ भित्राइएको थियो । विश्व कप सुरु हुन केहि दिन बाँकी रहँदा रियलले उनलाई जिदानको उत्तराधिकारी घोषणा गरेपछि स्पेनले लोपेटेगुइलाई बर्खास्त गरको थियो ।

रियलको नेतृत्व सम्हालेपछि लोपेटेगुइले स्पेन तथा रियल सोसिडाडका राइट–ब्याक अल्भारो ओड्रिओजोलालाई अनुबन्धित गरिसकेको छ । उनलाई ३५ मिलियन पाउण्डमा रियलले भित्राएको हो । यस घटनासँगै रियलका अध्यक्ष फ्लोरेन्टिनो पेरेजले यो सिजनको ट्रान्सफरमा २२ वर्षे खेलाडीमा ध्यान दिने प्रतिबद्धता गरेका थिए ।

ट्रान्सफरका लागि अब केहि समयमात्र बाँकी रहँदा रियलले भित्राउन सक्ने सम्भावित खेलाडीको यहाँ चर्चा गरिएको छ ।

नेयमार (पिएसजी)
नेयमार रियलका अध्यक्ष फ्लोरेन्टिनोको नजरमा सबैभन्दा अगाडि छन् । यसअघि पनि रियलले उनलाई दुई पटक सम्म भित्राउने प्रयास गरेको थियो । यसअघि सन् २००५ मा उनलाई उनलाई रोविन्होको विकल्पका रुपमा हेरिएको थियो । तर उनी स्वदेशकै सान्तोषमा खेल्न तयार भए । दोस्रो पटक २०१३ मा उनलाई पुनः रियलले प्रयास गरेको थियो ।

तर त्यति बेला उनले रियलको नभई बार्सिलोनाको बाटो रोजे । पछिल्लो सिजनमात्र उनी कीर्तिमानी रकममा पेरिस सेन्ट जर्मेन (पिएसजी) पुगेका थिए । जहाँ चोटग्रस्त हुनुअघि उनले उच्च प्रदर्शन गरेका थिए । तेस्रो पटक रियलको उनलाई लिने प्रयास सफल हुन्छ वा हुन्न त्यसको लागि केहि समय अझै कुर्नुपर्ने हुन्छ । यद्दपी उनी अझै एक सिजन पिएसजीमै रहन चाहेको पनि बताइएको छ ।

केलियन एमबाप्पे (पिएसजी)
केलियन एमबाप्पे रियलले लिन चाहेका अर्का युवा खेलाडी हुन् । पिएसजीकै स्टार एमबाप्पेलाई लिन चाहेको रियलले सार्वजनिक रुपमै स्वीकार गरेको छ । यहि साता फ्रान्सले विश्व कप जित्दाका एमबाप्पे महत्वपूर्ण सदस्य हुन् । १९ वर्षे उनी गत सिजन मोनाकोबाट लोनमा पिएसजी गएका थिए ।

नेयमारलाई लिन सफल नभएको खण्डमा एमबाप्पे रोनाल्डोको विकल्प हुन सक्ने अडकल कालिटएको छ । तर, एमबाप्पले पनि अझै पिएसजीमै रहन चाहेको संकेत गरेको बताइएको छ ।

इडेन हाजार्ड (चेल्सी)
चेल्सीका इडेन हाजार्डलाई रियलले नेयमार र एमबाप्पेको विकल्पको रुपमा हेरेको छ । आक्रामक मिडफिल्ड हाजार्डको नेतृत्वमा इंग्लयान्डलाई पराजित गर्दै बेल्जियमले विश्वकपमा तेस्रो स्थान प्राप्त गरेको थियो । उनले चेल्सीमा ६ सिजन बिताइसकेका छन् ।

सञ्चार माध्यमका अनुसार उनी रियल जान इच्छुक छन् । २७ वर्षे हाजार्डले क्लब परिवर्तन गर्दा आफ्ना लागि राम्रो हुने उनको विश्वास छ । तर, विश्व कपमा उनको प्रदर्शन देखेर पनि चेल्सी उनलाई सहजै छाड्ने पक्षमा छैन ।

ह्यारी केन (टोटेनह्याम)
ह्यारी केन विश्व कपमा ह्यारी केनले सर्वाधिक गोलकर्ताको रहेका थिए । विश्वकपमा ६ गोल गरेका टोटनह्यामका स्ट्राइकरले रियलसँग केहि साइनो गाँस्ने सम्भावना बढेको छ ।

करिम बेन्जिमा मात्र सिनियर सेन्टर फरवार्ड रहेको रियललाई अर्को फरवार्डको आवश्यकता छ । यद्दपी केनले टोटेनह्यामसँग लामो सम्झौता गरेका छन् । २४ वर्षे उनले टोटेनह्यामका लागि उपाधि जित्ने सपना देखेको बताएका छन् ।