लन्डन (एजेन्सी) – घरेलु लिगमा इंग्ल्यान्डको इंग्लिस प्रिमियर लिगलाई विश्वमा सबैभन्दा प्रतिस्पर्धात्मक र रोमाञ्चक लिगको रुपमा लिने गरिन्छ । त्यसो त स्पेनिस ला लिगा, जर्मन बुन्डेस लिगा, इटालियन सिरी ‘ए’ र फ्रन्च लिग वानलाई पनि विश्वमा सबैभन्दा बढी हेरिने लिगको रुपमा लिइन्छ ।

अन्य लिगको तुलनामा इंग्लिस प्रिमियर लिगकै बढी चर्चा हुने गर्दछ । यहाँ विभिन्न देशका खेलाडी देखि प्रशिक्षकसम्मको चर्को प्रतिस्पर्धा चलेको हुन्छ । प्रिमियर लिगको नयाँ सिजन शुरु हुनै लाग्दा यहाँ फेरि एकपटक खेलाडी भन्दा पनि प्रशिक्षकबीच चर्को प्रतिस्पर्धा हुने आँकलन गरिएको छ ।

प्रिमियर लिगमा प्रशिक्षकको रुपमा यसपटक पेप ग्वार्डिओला, जोसे मौरिन्हो, योर्गन क्लोप, मौरिसियो पोचेटिन्हो यथावत रहँदा आर्सनलमा आर्सेनी विङ्गरको स्थानमा पिएसजीका इम्री क्यान र चेल्सीमा एन्टोनियो कोन्टेको स्थानमा मौरिसियो सारी क्लबलाई उपाधि जित्ने योजनाका साथ आएका छन् । उनीहरुले यस सिजनको लागि राम्रा–राम्रा खेलाडी अनुबन्ध गरिसकेका छन् ।

त्यसैले यस सिजनको प्रिमियर लिग झनै रोमाञ्चक हुने अनुमान गर्न थालिएको छ । अघिल्लो सिजनको च्याम्पियन म्यानचेस्टर सिटीले कडा प्रतिस्पर्धाको बीचबाट प्रतिद्धन्द्धीलाई १९ अंकले पछि पार्दै प्रिमियर लिग जितेको थियो । यतिमात्र हैन सिटीले प्रिमियर लिगमा कीर्तिमानी १ सय अंक र १ सय ६ गोल गर्न सफल भएको थियो ।

के यसपटक पनि सिटीले १९ अंककै अग्रतामा प्रिमियर लिगको उपाधि जित्न सक्ला ? यसपटक सिटीलाई उपाधि रक्षा गर्ने चुनौती छ । डेली मेलस्पोर्टस् ले यसपटक ६ प्रशिक्षक रहेको टिमको प्रिमियर लिग उपाधि जित्न सक्ने सम्भावनालाई केलाएका छन् ।

म्यानचेस्टर सिटी (च्याम्पियन)
पेप ग्वार्डिओलाको म्यानचेस्टर सिटीमा यो तेस्रो कार्यकाल हो । पहिलो सिजन टिमलाई औसत स्थानमा राखेका स्पेनिस क्लब बार्सिलोनाका पूर्व प्रशिक्षक समेत रहेका पेपले आफ्नो दोस्रो कार्यकालमा सिटीलाई फराकिलो अन्तरमा च्याम्पियन बनाइ छाडेका थिए ।

पेप तेस्रो कार्यकालमा पनि सिटीलाई दोस्रोपटक प्रिमियर लिग च्याम्पियन बनाउने योजनामा रहेका छन् । विश्वका उत्कृष्ट खेलाडीहरुको संयोजन रहेको सिटीमा प्रशिक्षक ग्वार्डिओलाले टिमको अग्रपङ्ति झनै बलियो बनाउन लेस्टर सिटीबाट रियाद महारेजलाई ६० मिलियन पाउन्डमा यस सिजन अनुबन्ध गरिसकेको छ ।

सिटीमा ब्राजिलका गाब्रियल जेसस, बेल्जियमका केभिन डि ब्रुयन, इंग्ल्यान्डका रहिम स्ट्रलिङ, जर्मनीका लिरोय साने र अर्जेन्टिनाका सर्जियो अग्विरो जस्ता खेलाडीहरु अग्रपङ्तिमा रहनेछन् । महारेजको आगमनले टिम झनै बलियो बनेको छ । ग्वार्डिओलाले इटाली तथा रोमाका मिडफिल्डर जर्जिन्होलाई भने क्लबमा अनुबन्ध गर्न सकेन ।

म्यानचेस्टर युनाइटेड (दोस्रो)
म्यानचेस्टर युनाइटेड प्रिमियर लिगमा सदाको दावेदार टिम हो । तर, युनाइटेड अघिल्लो सिजन शहरी प्रतिद्धन्द्धी म्यानचेस्टर सिटीसँग १९ अंकले पछि रहँदै दोस्रो स्थानमा खुम्चियो । यति मात्र हैन युनाइटेड एफए कपको फाइनलमा चेल्सीसँग र च्याम्पिन्स लिगमा सेभियासँग पराजित हुदै उपािधिविहीन बनेको थियो ।

यसपटक प्रशिक्षक जोजे मौरिन्हो कुनैपनि हालतमा प्रिमियर लिगको उपाधि जित्ने योजनामा रहनेछ । युनाइटेडले यो सिजन ब्राजिलका मिडफिल्डर फ्रेडलाई ५२ मिलियन पाउन्डमा क्लबमा अनुबन्ध गरेको छ । पोर्चुगलका डिफेन्डर डिएगो डालोटलाई १७ मिलियन पाउन्ड र इंग्ल्यान्डका गोलरक्षक लि ग्रान्टलाई अनुबन्ध गरेको छ ।

डिफेन्डर ह्यारी मिगुरेलाई अनुबन्ध प्रयास थालिरहेको छ । यसपटक जोजे मौरिन्होले नयाँ खेलाडी फ्रेड र विश्वविजेता टिमका पल पोग्वाबाट ठुलो अपेक्षा राखेको छ । उनीहरुलाई एलेक्सिस साञ्चेज र मार्कुस रासफोर्डसाथे दिने मौरिन्हाको विश्वास छ ।

टोटनह्याम हस्टपर (तेस्रो)
अघिल्लो सिजन उच्च प्रदर्शन गरेका टोटनह्याम हस्टपर यसपटक खेलाडी किनबेचमा स्थिर देखिएको छ । म्यानेजर मौरिसियो पोचेटिन्हो आफ्नो पुराना खेलाडीबाटै उपाधि जित्न सक्नेमा आशावादी छन् ।

रसिया विश्वकपको गोल्डेन बुट विजेता ह्यारी केनले सम्झौता नवीकरण गरेपछि टिमको मनोवल उच्च बनेको छ । तर, टिमका महत्वपूर्ण सदस्य डेल अलि र क्रिस्टियन इरिक्सनले क्लब छोड्न सक्ने छ । उनीहरुले क्लब छाडे टोटनह्यामको उपाधि यात्रामा केही असहज हुनेछ ।

लिभरपुल (चौथो)
जर्गेन क्लोप लिभरपुलमा प्रशिक्षक भएर आएपछि लिभरपुलले गज्जवको प्रदर्शन गरिररहेको छ । उनकै प्रशिक्षणमा लिभरपुल च्याम्पियन्स लिगको फाइनलसम्म पुग्न सफल हुदा प्रिमियर लिगमा चौथो स्थान हात पार्न सफल भएको थियो ।

खेलाडी अनुबन्धमा नचुक्ने क्लोपले यो सिजनको लागि ब्राजिलका गोलरक्षक एलिसन बेकरलाई ६७ मिलियन कीर्तिमानी मुल्यमा क्लबमा अनुबन्ध गरिसकेको छ । नावी केइटा, फाबिन्हो र जर्दान शाकिरीलाई क्लबमा अनुबन्ध गर्दै सन्तुलित टिम बनाएको छ । टिमा अघिल्लो सिजन उच्च प्रदर्शन गरेका मोहम्मद सलाह र साडियो मानेको पनि साथ रहनेछ ।

चेल्सी (पाँचौ)
चेल्सीले अघिल्लो सिजन प्रिमियर लिगमा राम्रो प्रदर्शन गर्न सकेन । अघिल्लो सिजन राम्रो प्रदर्शन गर्न नसकेपनि चेल्सीले एफए कपको उपाधि जित्न सफल भएको थियो । प्रिमियर लिगको उपाधि जित्ने लक्ष्यसहित चेल्सीले यसपटक प्रशिक्षक परिवर्तन गरेको छ ।

चेल्सीको नयाँ प्रशिक्षकको रुपमा रोमाका इटालियन प्रशिक्षक मौरिसियो सारीलाई नियुक्त गरेको छ । प्रशिक्षकमा नियुक्त भएसँगै सारीले नयाँ खेलाडीको रुपमा इटाली तथा रोमाका मिडफिल्डर जर्जिन्होलाई ५७ मिलियन पाउन्डमा नियुक्त गरेको छ ।

बेल्जियमका इडेन हजार्ड र गोलरक्षक थिवाउट कोर्टुवा रियल जाने हल्ला चलिरहँदा प्रशिक्षक सारी उनलाई रोक्ने योजनामा हुनेछ । चेल्सीले युभेन्टस्का गोन्जलो हिग्विनलाई अनुबन्ध गर्ने प्रयास थालेको छ । हजार्ड र कोर्टुवालाई रोक्न नसके चेल्सीलाई यसपटक उपाधि जित्न कठिन हुनेछ । समर ट्रान्सफर बाकी रहँदा टिममा के कस्तो परिवर्तन हुने हो त्यो भने हेर्न बाँकी छ ।

आर्सनल (छैटौ)
आर्सनलले आफ्नो मुख्य प्रशिक्षक आर्सेनी विङ्गरलाई परिवर्तन गर्दै फ्रेन्च क्लब पिएसजीका प्रशिक्षक इम्री केनलाई प्रशिक्षकमा नियुक्त गरेको छ । अघिल्लो सिजन मध्यम प्रदर्शन गरेपछि आर्सनल प्रशिक्षक फेर्न बाध्य बनेको थियो । इम्री प्रशिक्षमा नियुक्त भएसँगै टिममा पाँच खेलाडी अनुबन्ध गरिसकेको छ ।

नयाँ खेलाडी लुकास टोरेराबाट प्रशिक्षक इम्रीले धेरै आशा गरेका छन् । विश्वविजेता फ्रान्सका स्टेफन एन्जोन्जीलाई इम्रीले क्लबमा अनुबन्ध गर्ने योजना बनाएको छ । प्रशिक्षक इम्रीले यसपटक यिनै खेलाडीहरुबाट प्रिमियर लिगमा शीर्ष चार स्थान हात पार्न सकिने बताएको छ ।