म्यानचेस्टर (एजेन्सी)– एन्टोनी मार्सियललाई बिक्रि गरेमा त्यो म्यानचेस्टर युनाइटेडको ठूलो भूल हुने पूर्व कप्तान वायन रुनीले बताएका छन् । मार्सिलयसँग अनौठो क्षमता रहेको रुनीको बुझाई छ । जोसे माउरिन्होको नेतृत्वमा मार्सियलले नियमित खेल्ने मौका पाएका छैनन् । तर, लुइस भान हालको समयमा भने उनी पर्याप्त मौका पाउने गरेका थिए ।

फ्रान्सेली मार्सियल मोनाको बाट ३८ मिलियन पाउन्डमा युनाइटेड पुगेका थिए । बढी खेल्ने अपेक्षाका साथ मार्सिलयल क्लब छाड्ने सोचमा रहेको बताइएको छ । सुरुमा प्रशिक्षक माउरिन्होले भने उनी टोलीका लागि आवश्यक खेलाडी रहेको बताएका थिए ।

अहिले पछिल्लो समयमा भने उनलाई विक्री गर्न सकिने भनाई सार्वजनिक भएको छ । तर प्रिमियर लिग क्लबमा नभई अन्य क्लबमा बेच्न सकिने माउरिन्होको भनाई रहेको छ । युनाइटेडका पूर्व कप्तान एवंम् सर्वाधिक गोलकर्ताले मार्सियललाई विक्री गर्नु गल्ति हुने बताएका छन् ।

‘क्षमताका हिसाबले मार्सियल अनौठो छन् । तर उनीबाट उत्कृष्ट कसरी निकाल्ने तिमीमा भर पर्दछ,’ उनले भने, ‘मैले जति पनि उनलाई चिनेको छु , उनीमा भएको क्षमता निकाल्न सकेको खण्डमा उनी लिगका उत्कृष्ट हुनेछन् । व्यक्तिगत रुपमा उनलाई बुझ्न केहि कठिन हुन सक्छ । तर उनलाई राम्ररी बुझेपछि खुसी पाउनेछौं ।’