काठमाडौं (हाम्रो खेलकुद) – एसियाड फुटबल र साफ च्याम्पियनसिपको तयारीमा थाइल्यान्ड रहेको नेपाली युवा फुटबल टोलीले आज पहिलो अभ्यास खेल खेल्दैछ । नेपाली टोली र थाइल्यान्डको पुलिस टेरो क्लबबीचको मैत्रीपूर्ण खेल नेपाली समय अनुसार साँझ ५ बजे बोनयाचिन्दा स्टेडियममा सुरु हुनेछ ।

राष्ट्रिय टोली महत्वपूर्ण दुई सदस्य रोहित चन्द र गोलकिपर किरण चेम्जोङ उपलब्ध हुनेछैनन् । किरणको भिसा समस्याका कारण र रोहितलाई क्लबले नपाठाएको कारण उनीहरु पहिलो अभ्यास खेलमा उपलब्ध नहुने भएका हुन् । किरण आज थाइल्यान्डतर्फ प्रस्थान गर्नेछन् । किरण थाइल्यान्डको यु–२३ टिमसँगको दोस्रो मैत्रीपूर्ण खेलमा भने उपलब्ध हुनेछन् ।

नेपालले दोस्रो अभ्यास खेलमा शुक्रबार थाइल्याण्डको यू–२३ टोलीसंग थाम्मासत युनिभर्सिटी मैदानमा खेल्नेछन् ।प्रशिक्षण र अभ्यास खेलको लागि नेपाली टोली शुक्रबार नै थाइल्याण्ड पुगिसकेको छ । साफ र एसियन गेम्सको लागि नेपालले २६ खेलाडीलाई अभ्यासमा पठाएको हो । स्ट्राइकर भरत खवास भने चोटका कारण टोलीसँगको भ्रमणमा गएका छैनन् ।

थाइल्याण्डको प्रशिक्षणपछि नेपाली टोली त्यहीबाट इन्डोनेसियामा जानेछन् । एसियन गेम्समा नेपाल समूह डीमा रहेको नेपालले जापान, भियतनाम र पाकिस्तानसँग खेल्नेछन् । एसियाड भदौ २ गते औपचारिक रुपमा सुरु हुने भएपनि फुटबल भने केहि दिन अघिबाट सुरु हुनेछ ।