मोनाको (एजेन्सी) – यसै महिनाको अन्तिममा घोषणा हुने युइएफए च्याम्पियन्स लिग अवार्डको मनोनयनमा स्पेनिस क्लब रियल मड्रिडका खेलाडीले वर्चस्व जमाएका छन् । अवार्डको चार विधा (गोलरक्षक, डिफेन्डर, मिडफिल्ड र फरवार्ड) मा च्याम्पियन्स लिग विजेता रियल मड्रिडका सात खेलाडी मनोनयनमा परेसँगै मनोनयमा रियलका खेलाडीले वर्चस्व जमाएको हो ।

रियलका सुपरस्टार क्रिस्टियानो रोनाल्डो (हाल युभेन्ट्स), केलर नाभास, मार्सेलो, राफेइल भरान, सर्जियो रामोस, टोनी क्रुस र लुका मोड्रिच अवार्डको विभिन्न विधामा मनोनयनमा परेका हुन् । यस्तै मनोनयनमा बार्सिलोनाका लियोनेल मेस्सी, लिभरपुलका मोहम्मद सलाह, म्यानचेस्टर सिटीका केभिन डि ब्रुयन, रोमाका एलिसन बेकर र युभेन्टस्का जियानलुजी बुफोन मनोनयनमा परेका छन् ।

च्याम्पियन्स लिगको फाइनलमा गोल गरेका ग्यारेथ बेल मनोनयनमा पर्न असफल रहे । उनी च्याम्पियन्स लिगका ३२ टिमका ३२ प्रशिक्षक र युइएफएका सदस्य राष्ट्रका ५५ जना पत्रकारको नजरमा पर्न असफल रहे ।पोजिसन अवार्डको डिफेन्डरको मनोनयनमा रियलले क्लिन स्वीप नै गरेको छ ।

यस्तै युरोपा लिगको प्लेयर अफ दि सिजनको लागि स्पेनिस क्लब एट्लेटिको मड्रिडका एन्टोइन ग्रिजम्यान, डिएगो गोडिन र मार्सेलीका डिमिट्री पायटबीच प्रतिस्पर्धा हुनेछ । अवार्ड च्याम्पियन्स लिग र युरोपा लिगको नयाँ सिजनको समूह चरण विाजन हुने दिन अगस्ट ३० र ३१ तारिखमा मोनाकोमा हुनेछ ।

 

गोलकिपर मनोनयनः एलिसन बेकर (रोमा हाल लिभरपुल), जियानलुजी बुफोन (युभेन्टस् हाल पेरिस सेन्ट जर्मेन (पिएसजी)) र केलर नाभास (रियल मड्रिड)

डिफेन्डर मनोनयनः मार्सेलो (रियल मड्रिड), सर्जियो रामोस (रियल मड्रिड) र राफेइल भरान (रियल मड्रिड)

मिडफिल्डर मनोनयनः केभिन डि ब्रुयन (म्यानचेस्टर सिटी), टोनी क्रुस (रियल मड्रिड) र लुका मोड्रिच (रियल मड्रिड)

फरवार्ड मनोनयनः लियोनेल मेस्सी (बार्सिलोना), क्रिस्टियानो रोनाल्डो (रियल मड्रिड हाल युभेन्टस्) र मोहम्मद सलाह (लिभरपुल)