ओल्डट्राफोर्ड (एजेन्सी) – शुक्रबारबाट शुरु भएको युरोपेली क्लब लिग फुटबल अन्र्तगतको सबैभन्दा लोकप्रिय लिग इंग्लिस प्रिमियर लिग फुटबलमा म्यानचेस्टर युनाइटेडले विजयी शुरुवात गरेको छ ।

घरेलु मैदान ओल्डट्राफोर्डमा भएको लिगको पहिलो खेलमा युनाइटेडले लेस्टर सिटीलाई २–१ ले पराजित गर्दै विजयी शुरुवात गरेको हो । युनाइटेडको जितमा पल पोग्वा र लुका साले गोल गरे । लेस्टरका जेमी भार्डीले एक गोल फर्काए ।

युनाइटेडले खेलको तेस्रो मिनेटमा नै अग्रता बनाउन सफल भएको थियो । पल पोग्वाले पेनाल्टीमार्फत गोल गर्न सफल भएको थियो । आफैले डि–बक्समा बल क्रस गर्दा लेस्टरका अमारटेले ह्यान्ड गरेपछि युनाइटेडले पेनाल्टीको मौका पाएको थियो । जसमा टिमको कप्तानी गरिरहेको पोग्वा चुकेनन् । १–० ले पछि परेपछि लेस्टरले युनाइटेडमाथि दवाव सिर्जना गरेपनि गोल गर्न नसक्दा पहिलो हाफ १–० मा सकिएको थियो ।

दोस्रो हाफमा पनि युनाइटेडमाथि लेस्टर हावी बनेको थियो । तर, ८३ औं मिनेटमा लुका सा ले गोल गरेपछि युनाइटेड २–० ले अघि बढेको थियो । माटाले दिएको चिप पासमा लुकाले सहजै गोल गरेको थियो । इन्जुरी समयमा जेमी भार्डीले गोल गरेपनि त्यो लेस्टरको जिताउन पर्याप्त बनेन । युनाइटेडले २–१ ले खेल आफ्नो पक्षमा पार्न सफल भयो । प्रिमियर लिग अन्र्तगत आज ६ खेल हुदैछ ।

प्रिमियर लिगमा आजको खेलहरु
१. न्युक्यासल युनाइटेडविरुद्ध टोटनह्याम हस्टपर (साँझ ५ः१५ बजे)
२.बोर्नामाउथविरुद्ध कार्डिफ सिटी (साँझ ७ः४५ बजे)
३. फुलह्यामविरुद्ध क्रिस्टल प्यालेस (साँझ ७ः४५ बजे)
४.हडर्सफिल्ड टाउनविरुद्ध चेल्सी(साँझ ७ः४५ बजे)
५. वाटफोर्डविरुद्ध ब्रिङटोन एन्ड अल्वियोन(साँझ ७ः४५ बजे)
६. वल्भरह्याम्टन वन्डरर्सविरुद्ध एभर्टन (राति १०ः१५ बजे)