काठमाडौं (हाम्रो खेलकुद)– सय दिन पनि पुरा नहुँदै अखिल नेपाल फुटबल संघ (एन्फा) को नयाँ कार्यसमितिको काम कारवाही छानबिन गर्न र कारवाही गर्न माग गरिएको छ । एन्फाका पूर्व वरिष्ठ उपाध्यक्ष मणी कुँवरले युवा तथा खेलकुद मन्त्री र राष्ट्रिय खेलकुद परिषद् (राखेप) का सदस्य सचिवलाई पाँच बुँदे ज्ञापनपत्र मार्फत छानविन र कारवाहीको माग गरेका हुन् ।

एन्फाका पूर्व वरिष्ठ उपाध्यक्ष मणी कुँवर । फाइल तस्बिर

वैशाख २२ गते भएको एन्फा निर्वाचनमा अध्यक्षमा उम्मेदवारी दिए पनि कुँवरले पछि निर्वाचन बहिष्कार गरेका थिए । उनको प्यानलबाट उम्मेदवारी दिएका गणेश चन्दबाहेक अन्यले भने माग लिएका थिए । कार्यसमितिको चयन प्रक्रियादेखि पछिल्लो तीन महिनामा एन्फाले लिएको निर्णयप्रति दक्षिण एसियाली फुटबल महासंघ (साफ) का उपाध्यक्ष समेत रहेका कुँवरले असन्तुष्टी व्यक्त गरेका छन् ।

विभिन्न व्यक्तिलाई डर त्रास देखाउँदै र धेरैलाई प्रलोभनमा पनि निर्वाचन गरेको आरोप लगाउँदै कुँवरले एन्फाको नेतृत्व फुटबल विकास भन्दा पनि व्यक्तिगत अभिष्ट पुरा गर्न लागेको उल्लेख गरेका छन् । उनले विना रेलिगेसनको लिग गरे फुटबललाई धारासायी बनाउन लागेको, विदेशी नागरिक नवीन पाण्डेलाई देशको प्रतिनिधित्व गर्दै फिफा कंग्रेसमा सहभागिता गराएको, विश्व कप फुटबलका लागि फिफाबाट प्राप्त २ सय ५० टिकट विक्रीमा पारदर्शिता नअपनाएको आरोप लगाएका छन् ।

त्यस्तै कार्यसमिति निर्वाचन भएको ३ महिना नबित्दै विशेष साधारण सभाबाट विधान संसोधन गरि एन्फामाथि कब्जाको प्रयास गर्न लागिएको आशंका गर्दै कुँवरले विधान विपरित मानार्थ वरिष्ठ उपाध्यक्ष नियुक्त गरेको, मन्त्रालय र राखेपको प्रदेश सम्बन्धि कुनै नियम नआउँदा एन्फाले मनोमानी प्रदेश संरचनामा जान लागमा उनले आपत्ती गरेका छन् । ज्ञापन पत्रमा एन्फाले जिल्लाको अधिकार खोस्न खोजेको पनि कुँवरको आरोप रहेको छ ।

एन्फा प्रवक्ता किरण राईले भने कुँवरको ज्ञापन पत्र अर्थहिन भएको बताएका छन् । उनले लिगका विषयमा सहभागी क्लब, फिफा एएफसीको सहमति लिइसकेको र चार वर्षदेखि स्थगित लिगलाई सञ्चालनमा ल्याउन एक पटक विना रेलिगेसनको लिग गर्न लागिएको बताए । उनले भने, ‘हामीलाई पनि विना रेलिगेसनको लिग गर्ने इच्छा होइन । तर, फुटबलको माहोल सुरु गर्न विना रेलिगेसनको लिग गर्न बाध्य भएका छौं । यसलाई कसरी व्यवस्थित गर्न सकिन्छ त्यसमा हामी सचेत छौं ।’

राईले नवीन पाण्डे विदेशी नागरिक नभई गैर आवासिय नेपाली भएको प्रष्ट पार्दै संविधानले दिएको अधिकार अनुसार उनलाई जिम्मेवारी दिएको बताए । एन्फाको वैशाख कार्यसमितिले उनलाई एन्फाको अन्तर्राष्ट्रिय विभाग प्रमुख र सल्लाहकार नियुक्त गरेको उल्लेख गर्दै राईले भने, ‘फिफामा प्रतिनिधिका रुपमा पठाउने निर्णय पनि एन्फाको कार्यसमितिले नै गरेको हो । उहाँको नियुक्तीले नेपाली फुटबललाई फाइदा पुग्छ भन्ने हाम्रो विश्वास हो । यदि घाटा हुने देखियो भने निर्णयमा पुर्नविचार हुनेछ ।’

उनले विधान संसोधनको प्रसगंमा प्रदेश गोष्ठिमा विधानका विषयमा छलफल भएको र त्यहि परिकल्पना अनुसार एन्फाको संरचनाका लागि खाका तयार भएको बताए । पहिला परिकल्पना हुन्छ । त्यसलाई प्रस्तावका रुपमा ल्याएर छलफलमा लगेका छौं, प्रवक्ता राईले शुक्रबार एन्फामा आयोजित पत्रकार सम्मेलनमा भने, सबै विषयमा विशेष साधारण सभामा छलफल हुनेछ । सभाले जे पास गर्छ एन्फाको संरचना त्यस्तै हुनेछ । एन्फाको विशेष साधारण सभा वैशाख ३० गते चितवनमा हुने प्रवक्ता राईले जानकारी दिए ।