एनफिल्ड (एजेन्सी) – डिफेन्डिङ च्याम्पियन म्यानचेस्टर सिटीले यस सिजनको इंग्लिस प्रिमियर लिग फुटबलमा विजयी शुरुवात गरेको छ । साविकको विजेता सिटीले आर्सनललाई उसकै घरेलु मैदानमा २–० ले पराजित गर्दै विजयी शुरुवात गरेको हो ।
सिटीको जितमा रहिम स्ट्रलिङ र बर्नाडो सिल्भाले समान एक गोल गरे । सिटीले १४ औं मिनेटमा रहिम स्ट्रलिङको गोलबाट अग्रता बनाउन पहिलो हाफमा सिटीले १–० को अग्रता बनाउन सफल भएको थियो । प्रतिस्पर्धात्मक बनेको खेलको ६४ औं मिनेटमा बर्नाडो सिल्भाले गोल गर्दै सिटीलाई २–० को अग्रता दिलाए ।
बेन्जामिन मेन्डीको क्रस पासमा बर्नाडोले डि–बक्स भित्रबाट गरेको सशक्त प्रहार आर्सनलका गोलरक्षक पिटर चेकले रोक्ने कुनै मौका पाएनन् । त्यसपछि थप गोल निस्कन नसक्दा सिटी २–० ले विजयी हुन सफल भयो । आर्सनलले पनि गोल गर्ने केही मौकाहरु खेर फाल्दा घरेलु मैदानमा पहिलो खेलमा पराजित हुन पुग्यो ।
प्रिमियर लिगकै अर्काे खेलमा साउथह्याम्टन र बर्नलीले गोलरहित बराबरी खेल्दै अंक बाँडेका छन् । यसअघि आजै लिभरपुलले वेस्टह्याममाथि ४–० को शानदार जित निकाल्दै प्रिमियर लिगमा विजयी शुरुवात गरिसकेको छ ।
