पछिल्लो केहि वर्षयता युईएफए च्याम्पियन्स लिगलाई रियल म्याड्रिडले आफ्नो नाममा गर्न सफल रहेको छ । लगातार ३ वर्ष प्रतियोगिता जित्नु बीई ठूलो सफलता हो । यस सिजन भने धेरै टोलीले नयाँ खेलाडी थप्दै च्याम्पियन्स लिग जित्नु आफ्नो मुख्य लक्ष्य बनाएका छन् । त्यसमध्य सबैभन्दा ठूलो विषय क्रिस्टियानो रोनाल्डोको युभेन्ट्स ट्रान्सफर रहेको छ। यस प्रकारको खेलाडी ट्रान्सफरले च्याम्पियन्स लिगको सम्भावना र समीकरणलाई समेत असर गरेको छ। यी हुन् च्याम्पियन्स लिग जित्न सक्ने ७ टोली :

७) बायर्न म्युनिख :

गत सिजन समेत उत्कृष्ट प्रदर्शन गरेको बायर्नले च्याम्पियन्स लिगमा विजेता बनेको टोलि रियल म्याड्रिडविरुद्ध हार बेहोरेको थियो । सेमिफाइनलमा रियलले बायर्नलाई समग्रमा ४-३ अन्तरले पराजित गरेको थियो । तर नयाँ सिजनको सुरुवातसँगै बायर्नले च्याम्पियन्स लिगमा जित दर्ता गर्ने अर्को आशा बुनेको छ । रोबर्ट लेवान्डोस्की जर्मन टोलीमा रहने भएसँगै बायर्नको जितको सपना अझ बलियो बनेको छ ।

६) लिभरपुल :

पछिल्लो सिजन उत्कृष्ट प्रदर्शन गरेको लिभरपुल जित बाट एक जित टाढा आइपुगेको थियो । आफ्नो आक्रामक खेलको लागि चिनिने लिभरपुलले खेल शैलीकै कारण पोर्टो, म्यानचेस्टर सिटि र रोमा जस्ता टोलीलाई हराएको थियो । यस सिजन समेत टोलीमा मोहम्मद सलाह, जेर्डान साकिरी, फाबिन्हो जस्ता खेलाडीको उपस्थितिले टोलि अझ सशक्त देखिएको छ । क्लोपको प्रशिक्षणमा रहेको टोली आफ्नो गत सिजनको लयलाई पुनः दोहोर्याउने दाउमा हुनेछ।

५) रियल म्याड्रिड :

च्याम्पियन्स लिगको साविक विजेता रियल म्याड्रिडबाट फेरिपनि ठूलो आशा राखिएको छ । कुनै टोलीलाई १ पटक उपाधि जित्न गाह्रो परिरहेको अवस्थामा रियलले भने पछिल्ला ५ वर्षमा ४ उपाधी हात पारेको छ । तर यसपटक भने आफ्ना स्टार खेलाडी क्रिस्टियानो रोनाल्डोको अभाव टोलीलाई पक्कैपनि खड्किने छ । ट्रान्सफर विन्डोमा थोरै समय बाँकी रहँदा समेत रियलले रोनाल्डोको स्थानमा कसैसँग सम्झौता गरेको छैन । एटलेटिको म्याड्रिड विरुद्धको सुपर कपको खेललाई हेर्ने हो भने रियलले च्याम्पियन्स लिग जित्न धेरै मेहेनत गर्नु पर्नेछ ।

४) म्यानचेस्टर सिटि :

सन् २०१७-१८ को प्रिमियर लिग च्याम्पियन टोलीले गत सिजन च्याम्पियन्स लिगमा राम्रो प्रदर्शन गरेको थियो । पेप ग्वार्डीओलाको प्रशिक्षणमा टोलीले यसपटक भने च्याम्पियन्स लिग जित्ने सपना देखेको छ । पछिल्लो सिजन सिटि च्याम्पियन्स लिगको क्वार्टरफाइनलबाट बाहिरिएको थियो । आफ्नो टोलीमा केहि उत्कृस्ट स्ट्राइकरको समुह रहेको सिटिले च्याम्पिन्स लिग जित्न सक्ने टोली तयार गरेको छ ।

३) पेरिस सेन्ट जर्मन :

युरोपमा आफ्नो उत्कृस्ट टोली भएपनि पेरिस टोलीले च्याम्पियन्स लिगमा राम्रो छाप छाड्न सकेको छैन । पछिल्लो सिजन समेत उपाधि विजेताको रुपमा हेरिएको टोलीले राउण्ड अफ १६ मा रियल म्याड्रिडसँग रोकिएको थियो। आक्रमण मजबुत देखिएको पेरिसमा नेईमार, एम्बाप्पे र काभानीजस्ता खेलाडीको उपस्थिति रहेको छ । सन्तुलित टोली रहेको पेरिसको यस सिजन डिफेन्स र मिडफिल्ड समेत उत्तिकै बलियो देखिन्छ ।

२) युभेन्ट्स:

यस सिजनको उपाधि दावेदार मानिएको युभेन्ट्समा क्रिस्टियानो रोनाल्डोको आगमनसँगै अझ नयाँ उर्जा थपिएको छ । टोलीमा स्टार स्ट्राइकरको आगमनले टोलीको मजबुत पक्ष अझ धेरै सबल बनेको छ । पछिल्लो ५ सिजनमा दुई पटक फाइनल पुगेको यूभेन्ट्सले दुवै पटक हार बेहोरेको थियो । यस सिजनभने युभेन्ट्सले च्याम्पियन्स लिग जित्ने ठूलो सपना बोकेको छ र अल्लेग्रीको टोलीले यो साकार बनाउने धेरैको बुझाइ छ ।

१) बार्सिलोना

गत सिजन रोमाविरुद्ध क्वार्टरफाइनलमा हार बेहोरेको टोली बार्सिलोना यस सिजनभने सुदृढ प्रदर्शन गर्ने दाउमा रहने छ । बार्सिलोनाका प्रशिक्षक एर्नेस्टो भाल्भार्डे आफ्नो गल्तिबाट पाठ सिकेको र सो दोहोर्याउन नहुने बुझेका छन् । जेरार्ड पिके र सामुएल उम्टिटीको नेतृत्वमा बार्सिलोनाको रक्षापंक्ति मजबुत रहेको छ । जोर्डी अल्बा र सर्जियो रोबेर्टो समेत राम्रो लयमा देखिएका छन् । टेर स्टेगेनको बिषयमा बोल्न जरुरि नरहँदा बार्सिलोनाको आक्रमण पछिल्लो १० वर्षकै उत्कृष्ट देखिएको छ । टोलीमा माल्क्म, आर्थर, भिडाल जस्ता खेलाडीको आगमनसँगै बार्सिलोनाको उपाधी जित्ने सपना साकार हुनसक्छ ।