म्याड्रिड (एजेन्सी) – गत सिजन रियल म्याड्रिडको बेन्च निकै मजबुत रहेको थियो । चाहेको अवस्थामा रियलले मुख्य टोलीकै स्तरका खेलाडीलाई मैदानमा उतार्न सक्ने क्षमता थियो ।

ती खेलाडीले मैदानमा उत्रेर राम्रो प्रदर्शन गर्थे र टोलीलाई जिताउँथे पनि । क्लबले जारी ट्रान्सफर विन्डोमा गरेका केहि गल्ति भने अहिले आएर टोलीलाई महँगो पर्ने देखिएको छ । यसअघिका ट्रान्सफर विन्डोमा पनि क्लबले निरन्तर गल्ति गर्दै त्यसको स्थानमा नयाँ खेलाडी ल्याउन चासो दिएको छैन । निकै बलियो देखिंदै आएको रियल म्याड्रिडको प्लान ‘बी’ कहाँ चुक्यो ? किन रियलको बेन्च यति कमजोर देखियो ? यी हुन् ५ खेलाडी जसले टोलि छाड्दा रियलको प्लान ‘बी’ सफल हुन सकेन :

५) ड्यानिलो:

गत सिजन जिनेदिन जिदानेले ड्यानिलो टोलीमा अतिरिक्त खेलाडी रहेको भनेसँगै रियलले उनलाई म्यानचेस्टर सिटीलाई बेचेको थियो । जिदानेले हाकिमी र भाजक्वेजले आवश्यक पर्दा राइट ब्याकमा कार्भाजलको स्थान लिन सक्नेमा विश्वास गरे । तर २०१७-१८ को सुरुवातबाट नै रियलले ड्यानिलोको कमि महसुस गर्न थाल्यो । हाकिमीको युवा र अनुभवहिन क्षमता रियललाई खेलमा सहयोग पुर्याउन पर्याप्त  थिएन । ड्यानिलोले बनाएको प्रभाव रियलमा हाकिमी, नाचो र भाजक्वेजले समेत बराबरीमा ल्याउन सकेनन् ।

४) मटियो कोभाचिच:

कोभाचिचले टोलि छाडेसंगै रियलको मिडफिल्डमा समस्या सिर्जना भएको छ । रियलले समय समयमा मात्र उनको प्रयोग गरेपनि उनी क्रुस र मोड्रीचलाई विश्राम दिँदा धेरै सहयोगी बन्ने गर्थे । सन् २०१७ को स्पेनिस सुपर कपमा बार्सिलोनाविरुद्ध कोभाचिचको प्रदर्शन सम्झनलायक थियो । उनी चेल्सीमा गएसंगै रियलको समस्याको ढोका खुलेको हो । रियलमा अब मोड्रीच र क्रुसको स्थानमा खेलाउन सकिने इस्को र सेबाल्लोसमात्र बाँकी रहेका छन् । इस्को आक्रामक रुपमा मात्र खेल्न सक्छन् भने सेबाल्लोस अझै मुख्य भूमिका निर्वाह गर्न तयार भएका छैनन् ।

३) पेपे :

आफ्नो रियल बसाइका क्रममा पेपे टोलीका कति महत्वपूर्ण खेलाडी थिए भन्ने कुरा सबै रियल समर्थकलाई थाहा छ । एक भेटेरान खेलाडीको काम रियलमा पेपेले गरेका थिए । डिफेन्समा पेपेको भूमिका निकै महत्वपूर्ण थियो । रामोसका नयाँ साथी भारानेसँग उत्कृष्ट शैली रहेपनि पेपेको स्थान उनले क्लबमा पूर्णरुपमा लिन सकेका छैनन् । यसबाहेक पेपेले क्लबमा नेतृत्वदायी भूमिका पनि निर्वाह गर्ने गरेका थिए ।

२) हामेस रोड्रीग्वेज :

रियल र रोड्रीग्वेजबीचको सम्बन्ध आशा गरे अनुसार चल्न नसक्दा आज रोड्रीग्वेज टोलीमा छैनन् । पहिलो सिजनमा रोड्रीग्वेजले रियलको आक्रमणलाई फरक स्तरमा पुर्याएका थिए । उनकै साथ रहँदा रियल विश्वकै एक सशक्त आक्रमण भएको टोलि बनेको थियो । तर रियलका प्रशिक्षकहरु राफा र जिदानेको उपस्थितिमा उनी कहिलेपनि चम्किन सकेनन् । आक्रमणबाट एक खेलाडीलाई हटाएर होल्डिंग मिडफिल्डरलाई खेलाउने रियलको ट्रेन्डसंगै उनले पहिलो रोजाईमा स्थान गुमाए । आफ्नो शैली अनुसार प्रशिक्षक नपाउँदा उनी क्लब छाड्न बाध्य भए र बायर्नमा आफ्नो प्रभाव जमाउन थालेका छन् ।

१) अल्भारो मोराटा :

सन् २०१६ मा रियल फर्किएसँगै मोराटाको प्रदर्शन उत्कृष्ट रहँदै आएको थियो । तर जिदानेले करीम बेन्जेमामाथि आँखा चिम्लिएर विश्वास गर्दा मोराटा रियलका लागि नियमित बन्न सकेनन् । मोराटाले पाएका मौकामा आफूलाई प्रमाणित गरेपनि जिदानेको विश्वासभने सधैं फ्रान्सेली बेन्जेमा माथि नै रहयो । मोराटासँग रियल छाड्ने कारण भएपनि जिदानेले किन उनलाई जान दिएभन्ने कुराको जवाफ सायद कसैसंग छैन । चेल्सीमा पनि लय समात्न कठिन भएको अवस्थामा मोराटा रियलका लागि उचित थिए भन्नेमा दुईमत छैन ।