प्रकाश तिमल्सिना
ढाका – नेपालले साफ सुजुकी कप (साफ च्याम्पियननसिप) मा बिहीबार भुटानविरुद्ध खेलको पहिलो हाफमा १–० को अग्रता लिएको छ । खेलको सुरुवातबाटै खेल नियन्त्रणमा राखेको नेपालले अनन्त तामाङको गोलबाट नेपालले २१ औं मिनेटमा अग्रता लिएको थियो ।

भुटानविरुद्ध गोल गरेपछि नेपाली टोली । तस्बिर: विवेक सुवेदी /हाम्रो खेलकुद

सुनिल बलको कर्नरमा अनन्तले सिक्स याडबक्सको लाइनबाट हेड गोल गरेका थिए । राष्ट्रिय टोलीका लागि अनन्तको यो दोस्रो गोल हो । उनले एएफसी सोलिडारिटी कपमा लाउसविरुद्ध २–२ को बराबरीमा १ गोल गरेका थिए । पहिलो खेलमा नेपाल पाकिस्तानसँग २–१ ले पराजित भएको थियो भने भुटानले आयोजक बंगलादेशसँग २–० को हार बेहोरेको थियो ।

सुजल श्रेष्ठ प्रहार गर्ने क्रममा । तस्बिर: विवेक सुवेदी /हाम्रो खेलकुद

नेपालले अहिलेको अग्रतालाई जोगाउन सके सेमिफाइनल पुग्ने सम्भावना जीवित रहन्छ । आजको खेल बराबरीमा टुंगिए वा गुमाएमा भने अघिल्लो चरणको यात्रा कठिन हुनेछ । नेपालले शनिबार समूह चरणको अन्तिम खेलमा नेपालले बंगलादेशको सामना गर्देछ ।

सुनिल बल बल अगाडी बढाउँदै । तस्बिर: विवेक सुवेदी /हाम्रो खेलकुद

पाकिस्तानसँगको खेल भन्दा मुख्य प्रशिक्षक बालगोपाल महर्जनले नियमित कप्तान विराज महर्जनसहित ३ खेलाडी परिवर्तन गरेका थिए । जसमा फरवार्डद्वय नवयुग श्रेष्ठ र भरत खवास रहेका छन् । दीनेश राजवंशी, विशाल राई र सुनिल बल आज पहिलो राजाइमा परेका थिए । राइट विङ्सबाट खेलका सुनिल भुटानविरुद्ध प्रभावकारी देखिएका छन् ।

अन्जन विष्ट खेलका क्रममा । तस्बिर: विवेक सुवेदी /हाम्रो खेलकुद