प्रकाश तिमल्सिना
ढाका – राष्ट्रिय टोलीका नियमित कप्तान एवं रक्षक विराज महर्जन नेपाली फुटबलले बारम्बार सम्झिरहने नाम बनेका छन् । ढाकामा जारी साफ च्याम्पियनसिपमा बिहीबार भुटानविरुद्ध खेलेबाट विराजले राष्ट्रिय टोलीका लागि सर्वाधिक क्याप जित्ने खेलाडी बनेका छन् । त्यो उनको ६९ औं खेल थियो ।

खेलपछि कप्तान बिराज महर्जन । तस्बिर : विवेक सुवेदी

यसअघि सर्वाधिक खेल खेल्ने खेलाडीका रुपमा पूर्व कप्तान राजुकाजी शाक्यले । शाक्यले खेल्न छाडेको २१ वर्षपछि विराजले उनको कीर्तिमानलाई उछिनेका छन् । विराजले एक दशक लामो अन्तर्राष्ट्रिय खेल जीवनमा यो उपलब्धी हासिल गरेका थिए । संयोग नै मान्नुपर्छ परिवर्तित खेलाडीका रुपमा डेब्यू गरेका विराजले परिवर्तित खेलाडीकै यो कोसेढुंगा पार गरेका छन् ।

सन् २००८ मा पाकिस्तानविरुद्ध मैत्रीपूर्ण खेलमा उनले राष्ट्रिय टोलीबाट डेब्यू गरेका थिए । भुटानविरुद्ध पनि उनले परिवर्तित खेलाडकिै रुपमा मैदान प्रवेश गरेर कीर्तिमान बनाएका छन् । विराज ८४ औं मिनेटमा दिनेश राजवंशीको सट्टा मैदान प्रवेश गरेका थिए । उनले पहिलो रोजाइमा नपरेको मात्र दुःख मनाउने गरेनन् । ‘मलाई पहिले नै थाहा थियो । आज म पहिलो रोजाइमा थिइन’, खेल पछि विराजले भने, ‘आज हाम्रो लागि तीन अंक महत्वपूर्ण थियो । त्यसमा सफल भएका छौं । हामी सुरक्षित अवस्थामा रहेपछि मेरो विषयमा पनि प्रशिक्षकले भन्नु भएको थियो ।’

एउटा खेलाडीका रुपमा जुन कीर्तिमान बनाउन सफल भएकोमा विराजले आफुलाई भाग्यमानी ठानेका छन् । ‘गर्व महसुस भएको छ । टिम जितेको खेलमा आफ्नो पनि कीर्तिमान बन्दा छुट्टै खालको रमाइलो हुने रहेछ’, विराजले खुसी साटे, ‘मैले डेब्यू गर्दा र अहिलेको टोलीमा धेरै परिवर्तन भइरहेको छ । नयाँ खेलाडी आएका छन् । मेरो सिनियरहरु धेरैले छोडिसक्नु भएको छ ।’

सन् १९९३ मा दक्षिण एसियाली खेलकुद (साफ) मा स्वर्ण पदक जितेयता नेपाली फुटबल दुई दशक भन्दा लामो समय उपाधि विहिन रहेको थियो । तर, २०७२ माघदेखि २०७३ कात्तिक सम्म नेपाली टोलीले तीन उपाधि जित्यो । ती तीनै उपलब्धिका नेतृत्वकर्ता उनी विराज थिए । २०७२ को माघमा बंगबन्धु गोल्ड कप जितेको नेपालले त्यहि बर्ष फागुनमा १२ औं दक्षिण एसियाली खेलकुद (साग) मा स्वर्ण पदक जितेको थियो । यू २३ ले खेल्ने साग भएपनि ३ सिनियर खेलाडी राख्न पाउने प्रावधान अनुसार विराजले त्यो टोलीको पनि नेतृत्व गरका थिए ।

२०७३ कात्तिकमा नेपालले एएफसी सोलिडारिटी कप जित्दा मैदानमा उनै कप्तान थिए । यद्दपी सोलिडारिटीमा अनिल गुरुङलाई कप्तानका रुपमा घोषणा गरिएपनि अधिकांश खेलमा विराजले नै कप्तानी गरेका थिए । एन्फा एकेडेमी दोस्रो ब्याचको उत्पादन विराजले सन् २००८ मा पोखरामा पाकिस्तानविरुद्ध भएको मैत्रीपूर्ण खेलमा राष्ट्रिय टोलीका लागि पहिलो पल्ट खेलेका थिए । डेब्यू गरेका थिए । उनी ८९औं मिनेटमा अन्जन केसीको स्थानमा मैदान छिदै राष्ट्रिय टिममा डेब्यु गरेका थिए । भारतविरुद्ध दुई वर्षअघि पुनेमा भएको मैत्रीपूर्णमा विराजले नेपालका लागि ५० औं खेल खेले पूरा गरेका थिए ।

उनले कप्तानीको पहिलो अवसर भने केरलाको त्रिवेन्द्रममा भएको साफ च्याम्पियनसिपमा पाएका थिए । जति बेला नेपालले लिग चरणको आफ्नो दोस्रो खेलमा भारतसँग खेलेको थियो । श्रीलंकाविरुद्धको पहिलो खेलमा अनिल गुरुङ कप्तान थिए । भारतविरुद्ध दोस्रो खेलमा भने अनिलले सुरुदेखि खेल्ने मौका पाएनन् । जसका कारण विराज कप्तान बने । कीर्तिमानसँग अब उनले सन्यासको पनि सोच बनाएका छन् । यद्दपी औपचारिक रुपमा कहिलेबाट विश्राम लिने भन्नेमा भने उनी खुल्न चाहेका छैनन् । ‘अब विश्राम लिनुपर्छ भन्ने सोच छ, उनले भने, नयाँ भाईहरुलाई मौका दिन पनि त्यो जरुरी छ’, उनले टुंग्याए ।