प्रकाश तिमल्सिना
ढाका– हरेक मान्छेका आफ्नै सपना हुन्छन् । फरक मान्छे फरक सपना । तर, राष्ट्रिय टोलीमा पर्ने हरेक खेलाडीको समान सपना भनेको टोलीलाई जित दिलाउने हुन्छ । त्यसपछि आउछ व्यक्तिगत सपना । साफ सुजुकी कप (साफ च्याम्पियनसिप) मा बिहीबार भुटानसँग खेल्दै कप्तान विराज महर्जनले नेपाललाई सर्वाधिक क्याप जित्ने सपना पुरा गरे ।

तस्बिर : विवेक सुवेदी / हाम्रो खेलकुद

उनकै ब्याचका फरवार्ड भरत खवासको व्यक्तिगत सपना भने अझै पुरा भएको छैन । भरतले धेरै अघिदेखि नेपालका लागि सर्वाधिक गोल गर्ने खेलाडी बन्ने सपना बुनेका थिए । उनी त्यो बाटोमा छन् पनि । भुटानसँगको खेलमा गोल गर्दै उनी सर्वाधिक गोलको अझ एकदम नजिक पुगेका छन् । नेपालका लागि भरतको त्यो १० औं गोल थियो ।

नेपालका लागि सर्वाधिक गोल गर्ने कीर्तिमान पूर्व कप्तान हरि खड्का र नीराजन रायमाझीको नाममा छ । उनीहरुले समान १३ गोल गरेका छन् । हरिले १३ गोलको कीर्तिमाान बनाएका थिए । नीराजनले सन् २००८ को साफ च्याम्पियनसिपमा पाकिस्तानविरुद्ध गोल गर्दै हरिको कीर्तिमानीसँग बराबरी गरेका थिए । हरिले भने सन् २००३ मा भएको एसियन कप छनोटमा अफगानिस्तानविरुद्ध ४-० को जितमा २ गोल गर्दै १३ गोल पूरा गरेका थिए ।

भरतले अब ३ गोल गरे दुई पूर्व फरवार्डको कीर्तिमानसँग बराबरी गर्ने छन्, ४ गोल गर्दा कीर्तिमान भंग हुनेछ । भनिन्छ, कीर्तिमान तोड्नकै लागि बनेका हुन्छन् । त्यसमा भरत पनि दृढ छन् । सायद उनलाई स्वास्थ्यसाथ दिन्थ्यो भने यो कीर्तिमानलाई उछिनी सकेका हुन्थ्ये । तर, दुर्भाग्य जति बेला अन्तर्राष्ट्रिय प्रतियोगिता नजिक हुन्छ , भरतलाइ केहि न केहि समस्या परेकै हुन्छ ।

तस्बिर : विवेक सुवेदी / हाम्रो खेलकुद

पछिल्लो पटक एसियाली खेलकुदका लागि छनोटमा परेर पनि चोटका कारण उनी इन्डोनेसिया जान सकेनन् । अन्तिम समयमा उनको ठाँउमा विशाल राई सहभागी भए । चोटग्रस्त भएर उनी टोलीबाट बाहिरिनुपरेको त्यो पहिलो पटक होइन । ‘कहिले जन्डिस, कहिले हात भाँच्चिने, कहिले विरामी भएर राष्ट्रिय टोलीमा नियमित हुन सकिन,’ उनले भने, ‘नियमित हुन्थे भने सायद त्यो सर्वाधिक गोलको कीर्तिमान तोड्थें होला । अझै पनि मेरो त्यो सपना छ, कुनै दिन कीर्तिमान तोड्छु ।’

भुटानसँग उनी पहिलो रोजाइमा त पर्न सकेनन् । तर, परिवर्तित खेलाडीका रुपमा मैदान प्रवेश गरेर एक पटक पुरानो झझल्को दिने गरि गोल गरे । एकल प्रयासमा उनले नेपालका लागि तेस्रो गोल गरेका थिए । मैदानको मध्यभागको केहि अगाडिबाट एक्लै बल अघि बढाउँदै भुटानका दुई रक्षकलाई कटाएर उनले सेकेन्ड बारमा गोल गरेका थिए । उनले राष्ट्रिय टोलीका लागि भन्डै २ वर्षपछि गोल गरेका हुन् ।

दुई वर्षअघि मलेसियामा भएको सोलिडारिटी कपमा नेपालले ब्रुनाइलाइ ३–० ले हराउँदा भरतले १ गोल गरेका थिए । एन्फा एकेडेमीको दोस्रो ब्याचका भरतले विराजसँगै सन् २००८ मा पोखरामा भएको पाकिस्तानविरुद्धको मैत्रीपूर्ण खेलमा डेब्यू गरेका थिए । तर, विराज र उनको खेल संख्यामा भने ठूलो अन्तर छ । त्यसको मुख्य कारण नै उनको स्वास्थ्य रह्यो । विराजले ६९ क्यापको कीर्तिमान बनाउँदा भरतले ४६ क्याप मात्र जितेका छन् । ‘स्वास्थले साथ दिए अझै केहि वर्ष खेल्छु, २८ वर्षे भरतले भने, ‘५० क्याप जित्ने र सर्वाधिक गोल गर्ने खेलाडी बन्ने सपना अझै छ । व्यक्तिगत सपना भएपनि अब आफुमा हिजो जस्तै आफै खेल्नु पर्ने सोच भने नभएको भरत सुनाउँछन् ।’

‘पहिला म खेल्न पाउँछु पाउँदिन भन्न लाथ्यो । हरेक खेल खेल्न पाए हुन्थ्यो भन्ने लाग्थ्यो,’ घरेलु फुटबलमा त्रिभुवन आर्मी क्लबका कप्तान रहेका भरतले भने, ‘अहिले त्यस्तो हुँदैन । आफु खेल्न पाए पनि नपाए पनि टिमले जित्नुपर्छ । हामी अहिले सम्म साफ च्याम्पियनसिप जितेका छैनौं । यो उपाधि लिएर फर्कने सपना छ । मेरो सपना विस्तारै पुरा हुँदै गर्छ । मरो व्यक्तिगत सपना पुरा हुनु अघि साफ च्याम्पियनसिप जित्ने देशको सपना पुरा गर्नुछ ।’