प्रकाश तिमल्सिना

ढाका – बंगलादेशमा जारी साफ च्याम्पियनसिपको समूह ‘ए’ को अन्तिम खेलमा नेपालले शनिबार आयोजकको सामना गर्दैछ । नेपाललाई सेमिफाइनलमा स्थान बनाउन जित आवश्यक छ । बराबरी भएको खण्डमा नेपालले भुटान र पाकिस्तानको खेलको नतिजामा निर्भर हुनुपर्ने छ ।

भुटानविरुद्ध पछिल्लो खेलमा नेपाल ४-० ले विजयी हुँदै ३ अंक जोड्न सफल रहयो । त्यसअघि पहिलो खेलमा नेपाल पाकिस्तानसँग २-१ ले पराजित भएको थियो । नेपालका कप्तान विराज महर्जनले पाकिस्तानविरुद्ध सुरुआती रोजाईमा खेलेपनि दोस्रो खेलमा भने बेन्चमा रहे । उनले वैकल्पिक खेलाडीको रुपमा मैदान प्रवेश गर्दै नेपालको लागि सर्वाधिक ६९ खेल खेल्ने कीर्तिमान आफ्नो नाम गरे । यसअघि उक्त कीर्तिमान ६८ क्यापसहित पूर्व कप्तान राजुकाजी शाक्यको नाममा थियो ।

कप्तान विराजले बंगलादेशसँगको खेलमा पछिल्लो खेलको लयलाई कायम गरे जित दर्ता गर्न सक्ने बताए । ‘खेल हाम्रो लागि ‘गर या मर’ को अवस्थामा छ । हामी बंगलादेशलाई पराजित गरेर सेमिफाइनल पुग्ने योजनामा हुनेछौं’, उनले भने, ‘बंगलादेशलाई जित्न नसकिने भन्ने हैन । दुवै टोली १९÷२० को अवस्थामा छ । भुटानविरुद्धको खेलको जितले टिमलाई प्रोत्साहन मिलेको छ । यही प्रदर्शनलाई हामी निरन्तर दिने योजनामा हुनेछौं । ‘