प्रकाश तिमल्सिना
ढाका– समकालिन प्रशिक्षकमा सफलताका हिसाबले बालगोपाल महर्जन सबैभन्दा अगाडी आउछन् । ढाकामा जारी साफ च्याम्पियनसिपमा नेपाल समूह विजेताका रुपमा सेमिफाइनल प्रवेश गरेको छ ।

तस्बिर : विवेक सुवेदी / हाम्रो खेलकुद

आयोजक बंगलादेशलाई २–० ले हराएपछि नेपाल गोलअन्तरका आधारमा समूह विजेताका रुपमा अन्तिम चारमा पुगेको हो । त्योसँगै महर्जन साफ च्याम्पियनसिपको इतिहासममा नेपाललाई सेमिफाइनल पुर्याउने पहिलो नेपाली प्रशिक्षक बनेका छन् । यसअघि तीन पटक नेपालले सेमिफाइनल यात्रा गर्दा विदेशी प्रशिक्षक थिए । नेपाल पहिलो पटक सन् १९९९, दोस्रो पटक २०११ र तेस्रो पटक २०१३ मा सेमिफाइनल पुगेको थियो ।

सन् १९९९ मा नेपाली टोलीको प्रशिक्षकमा जर्मनी प्रशिक्षक स्पिटलर फ्रान्क, २०११ मा ग्राहम रोबर्टस र २०१३ मा ज्याक स्टेफानोस्की नेपाली टोलीका प्रशिक्षक थिए । यसपटक पनि सायद भिसा समस्या नभएको भए नेपाली टोलीको प्रशिक्षक विदेशी नै हुने थिए । तर, भिसा समस्याका कारण नेपाली टोलीका नियमित प्रशिक्षक एसियाली खेलकुदबाट नेपाल फर्कन पाएनन् । त्यसपछि अखिल नेपाल फुटबल संघ (एन्फा) ले महर्जनलाई टोलीको कार्यवहाक प्रशिक्षक नियुक्त गरेको थियो । दश दिनको अभ्यास पछि महर्जन सेमिफाइनलको लक्ष्यसहित बंगलादेशका लागि उडेका थिए ।

पहिलो खेलमा पाकिस्तानसँग २–१ ले हारेपछि उनको रणनीतिलाई लिएर प्रश्न नउठेका पनि होइनन् । तर, उनी आत्तिएनन् भुटानसँगको खेलमा कप्तान विराज महर्जनसहित भरत खवास र नवयुग श्रेष्ठलाई बेन्चमा राख्ने जोखिम उठाए । त्यसमा उनी सफल भए नेपालले भुटानलाई ४–० ले हरायो । त्यहिबाट लयमा देखिएको नेपाली टोलीले जित्नै पर्ने खेलमा शनिबार बंगलादेशलाई निराश पार्यो । परिणाम दुई खेल जितेपनि बंगलादेश सेमिफाइनल पुग्न असफल भयो, नेपाल र पाकिस्तान अन्तिम चारमा पुगे । नेपाली टोलीलाई सफलता दिलाइरहँदा महर्जनको आवाज भने बसेको छ । घाँटीको समसयाले गर्दा यो खुसी उनले शब्दमा व्यक्त गर्न सकेनन् । तर, उनको हावभावबाट उनी निकै सन्तुष्ट देखिन्थे । प्रि म्याच र पोस्ट म्याचमा किरण श्रेष्ठले पत्रकारलाई जवाफ दिए ।

नेपाली टोलीका पूर्व कप्तान समेत रहेका महर्जनले सन् २००५ मा खेल जीवन छाडेको छोटो समयमै राष्ट्रिय टोलीको सहायक प्रशिक्षक हुने मौका पाएका थिए । महर्जनले त्यसपछि उमेर समूह सम्हाल्ने मौका पाए । उनले सफलताको स्वाद त्यहिबाट चाख्न सुरु गरेका थिए । केहि वर्षअघि नेपाली यु १६ लाई एएफसी च्याम्पियनसिपको अन्तिम चरणमा छनोट गराएका महर्जनको अर्को सफलताको कथा भने २०७२ को भदौबाट सुरु भएको थियो । उनको नेतृत्वमा नेपालले पहिलो यू १९ साफ च्याम्पियनसिपको उपाधि दिलाएका थिए ।

उक्त टोलीका स्टार विमल घर्तिमगर, अन्जन विष्ट, अनन्त तामाङ, सुनिल बल राष्ट्रिय टोलीकै स्टार भइसकेका छन् । महर्जनको सफलताको कथा पनि त्यसरी नै अघि बढेको छ । विसं २०७२ कै पुसमा उनले बंगलादेशमा बंगबन्धु गोल्ड कप जिताएपछि उनले समकालिन प्रशिक्षकलाई निकै पछि छाडेका थिए । प्रशिक्षण सरु गर्नु अघिको एक वर्ष उनले रेफ्रीको भूमिकामा आफुलाई प्रस्तुत गर्ने कोसिस गरेका थिए । तर, ढाडको समस्याले उनी प्रशिक्षण रोजे ।

सन् २००७ मा एएफसी फ्युचर कोर्सको पहिलो ब्याचका प्रशिक्षकका रुपमा प्रशिक्षण लिएपछि उनको नयाँ यात्रा प्रारम्भ भएको थियो । प्रशिक्षण जीवनको एक दशकमा उनले उमेर समूहदेखि राष्ट्रिय टोललाई दिलाएको सफलताले नेपाली प्रशिक्षक पनि क्षमतावान रहेको पुष्टि भएको छ ।