काठमाडौं (हाम्रो खेलकुद) – ‘ए’ डिभिजनको नवप्रवेशी ललितपुरको च्यासल युवा क्लबले क्लबको मुख्य प्रशिक्षकको रुपमा राजुकाजी शाक्यलाई अनुबन्ध गरेको छ ।क्लबले झन्डै पाँच वर्षपछि हुन लागेको शहिद स्मारक ‘ए’ डिभिजन लिगलाई शाक्यलाई अनुबन्ध गरेको हो । उनको अनुबन्ध असोज महिनाबाट लागु हुनेछ । प्रशिक्षक शाक्यले सिनियर राष्ट्रिय टिम, मनाङ–मस्र्याङ्दी क्लब, न्युरोड टिम एनआरटी जस्ता क्लबको प्रशिक्षण गराइसकेका छन् ।

च्यासलको मुख्य प्रशिक्षकमा नियुक्त भएपछि प्रशिक्षक शाक्यले आफ्नो अनुबन्ध लिग अवधि भरको लागि भएको बताए । उनले अनुबन्ध रकम भने खुलाउन चाहेनन् । प्रशिक्षकमा नियुक्त भएसँगै शाक्यले क्लबलाई च्याम्पियन बनाउने लक्ष्य रहेको बताउदै च्याम्पियन बन्न नसके राम्रो पोजिसनमा लिग अन्त्य गर्ने योजना रहेको सुनाए ।

‘च्यासल ‘ए’ डिभिजनमा नयाँ क्लब हो । हामी पहिलो सहभागितामै क्लबलाई च्याम्पियन बनाउने लक्ष्यमा छौं । राम्रा र अनुभवी खेलाडीलाई क्लबमा अनुबन्ध गर्ने प्रयास गरेका छौं । केही अनुभवी खेलाडी क्लबमा अनुबन्ध भैसकेका छन् ।’ प्रशिक्षक शाक्यले हाम्रो खेलकुदसँग भने, ‘अनुभवी खेलाडीको साथले हामीले च्याम्पियन बन्ने योजनामा छौं । च्याम्पियन बन्न नसके हाम्रो लक्ष्य एभरेजमा आउने हुनेछ । हामीले प्रयास गर्ने हो । खेलाडी अनुबन्धको लागि हामीसँग समय बाँकी छ ।’

प्रशिक्षक शाक्यले विदेशी खेलाडी अनुबन्धको लागि प्रयास भैरहेको बताए । क्लबले भापा–११ का अधिकांश खेलाडीलाई क्लबमा अनुबन्ध गरेको छ । राष्ट्रिय टिमका सदस्यसमेत रहेका डिफेन्डर देवेन्द्र तामाङ, हेमन्त थापामगर, दिनेश थापामगर र योगेश गुरुङलाई क्लबमा अनुबन्ध गरिसकेको छ । विश्व अधिकारी, अमिर श्रेष्ठ, यु–१९ का छिरिङ गुरुङ र गौरव बुढाथोकीलाई पनि क्लबमा अनुबन्ध गरिसकेको छ ।

‘ए’ डिभिजन लिग यही असोज १३ गतेबाट शुरु हुदैछ । करिव ५ महिनासम्म चल्ने लिगमा १४ ‘ए’ डिभिजन क्लबले प्रतिस्पर्धा गर्दैछन् । च्यासल २०७३ को ‘बी’ डिभिजन लिग च्याम्पियन बन्दै ‘ए’ डिभिजनमा बढुवा भएको थियो ।