काठमाडौं (हाम्रो खेलकुद)– नेपालले गत महिना बंगलादेशमा भएको साफ च्याम्पियनसिपमा सेमिफाइनल सम्मको यात्रा तय गरेको थियो । एक महिना नबित्दै बंगलादेशमै अर्को चुनौतिका लागि जाने तयारीमा जुटेको छ । नेपालले अर्को साता सुरु हुने बंगबन्धु गोल्ड कपमा प्रतिस्पर्धा गर्दैछ ।

साविक विजेता समेत रहेको नेपालको सहभागिता दुई दिन अघि मात्र पक्का भएको थियो । यसअघि उपाधि जित्दा पाउने पर्ने ५० हजार अमेरिकी डलर पुरस्कार राशीको आधा मात्र पाएकोले नेपालको सहभागिता अनिश्चित थियो । तर, दुई दिनअघि पुरस्कारको सबै राशी पाएको भन्दै अखिल नेपाल फुटबल संघ (एन्फा)ले बंगबन्धु गोल्ड कप खेल्ने निश्चित गर्दै २० सदस्यीय टोलीको घोषणा पनि गरिसकेको छ ।

जसमा साफ च्याम्प्यिनसिपमा भन्दा २ खेलाडी मात्र परिवर्तन छन् । अनुभवी दुई खेलाडी गोलकिपर किरण चेम्जोङ र मिडफिल्डर रोहित चन्द यसपटक टोलीमा छैनन् । व्यावसायिक खेलका लागि किरण माल्दिभ्स र रोहित इन्डोनेसिया गएपछि उनीको ठाँउमा महर्जनले गोलकिपर विशाल श्रेष्ठ र रक्षक तेज तामाङलाई समावेश गरेका छन् ।

५ वर्षपछि साफ च्याम्पियनसिपमा नेपाललाई अन्तिम चार सम्म पुर्याउने योगदान गर्ने मध्येका निराजन खड्का र सुनिल बलले बंगबन्धु गोल्डकपलाई लिएर उत्साहित छन् । साफ च्याम्पियनसिपमार्फत पहिलो पटक नेपाली टोलीको नियमित सदस्य बनेका सुनिलले भने,‘ हामी उत्साहित छौं । सेमिफाइनलमा हारेको इख छ । त्यति बेलाको गल्ति सुधारेर खेल्ने छौं । चुनौति कडा छ । तर पनि हामी राम्रो गर्न प्रयास गर्नेछौं ।’

माल्दिभ्ससँग पराजित हुँदै नेपाल साफ च्याम्प्यिनसिपबाट बाहिरिएको थियो । टोलीका सिनियर खेलाडी नीराजनले उपाधि जित्ने लक्ष्यका साथ बंगलादेश यात्रामा निस्कने बताए । ‘हामी साविक विजेता हौं । हामीले उपाधि रक्षाको आशा लिएर जाने हो,’ उनले भने,‘ सकारात्मक नतिजाका लागि आशावादी हुनुपर्दछ ।’

उनले टोली मानसिक रुपमा निकै बलियो रहेको पनि बताए । ‘प्रशिक्षणका लागि कहिले धेरै कहिले थोरै समय पाइन्छ । सबै व्यवसायिक खेलाडी भएकाले हामी मानसिक रुपमा तयार छौं,’ उनले भने,‘ साफ च्याम्पियनसिपको गल्तिबाट सिकेर हामी अघि बढ्ने छौं । त्यति बेलाको गल्ति दोहाराउने छैनौं । ’

https://www.facebook.com/Hamrokhelkud/videos/1158081710999846/