काठमाडौं (हाम्रो खेलकुद) – नेपाली राष्ट्रिय टोलीका कप्तान विराज महर्जनले नेपालले फेरी एकपटक बंगबन्धु कपको उपाधि जित्ने लक्ष्य रहेको बताएका छन् । नेपालले मंगलबार प्रतियोगिताको पहिलो खेलमा ताजिकिस्तानको सामना गर्दैछ ।

कप्तान बिराजले प्रतियोगितामा लय समात्न पहिलो खेल निकै महत्त्वपूर्ण हुने बताए । ‘हाम्रो लागि पहिलो खेल निकै महत्त्वपूर्ण छ । प्रशिक्षणका क्रममा हामीले फिटनेस पक्षमा निकै जोड दिएका छौं । सुरुआती खेलमा ३ अंक निकै महत्त्वपूर्ण छ । हामीसँग जितको विकल्प छैन र त्यसको लागि नै खेल्ने छौ,’उनले भने ।

कप्तान महर्जनले नेपाल प्रतियोगिताको डिफेन्डिङ च्याम्पियन भएका कारण केहि दबाब रहेको स्वीकारे । ‘ डिफेन्डिङ च्याम्पियन भएका कारण सबैले नेपाललाई सजिलो रुपमा लिने छैनन् । हामी आफैं केहि दबाब पनि छौं । हामीले त्यसैअनुसार  तयारी पनि गरेर आएका छौं, उनले थपे, ‘बंगलादेश आएपछि आज प्रशिक्षण राम्रो भयो । फेरी बंगबन्धुको उपाधि नेपाल लग्ने इच्छा छ । यसका लागि सक्दो प्रयास गर्नेछौं ।’

नेपालले पछिल्लो संस्करणमा बहराइन यू-२३ लाई फाइनलमा पराजित गर्दै प्रतियोगिताको उपाधि जितेको थियो । माल्दिभ्सलाई सेमिफाइनलमा हराउँदा नवयुग श्रेष्ठले अविश्वसनीय ह्याट्रिक गरेका थिए । यसपटक भने नेपालको समूहमा तुलनात्मक रुपमा बलिया प्यालेस्टाइन र फिलिपिन्स रहेका छन् ।