काठमाडौं (हाम्रो खेलकुद) – नेपाली राष्ट्रिय फुटबल टोलीले मंगलबार बंगबन्धु कप अन्तर्गत पहिलो खेलमा ताजिकिस्तानको सामना गर्दैछ । प्रतियोगिताका लागि नेपालले साफ च्याम्पियनसिपमा सहभागी टोलीबाट दुई खेलाडी परिवर्तन गरेको छ ।

राष्ट्रिय टोलीका पहिलो रोजाईका गोलरक्षक किरण चेम्जोङ र मिडफिल्डर रोहित चन्द टोलीमा छैनन् । दुवै खेलाडी विदेशी लिगमा खेल्ने भएकाले आफ्नो क्लबको खेलमा नै व्यस्त छन् । साफपछि किरणले टीसी स्पोर्ट्सको लागि एक खेल खेल्दै म्यान अफ द म्याच पनि पाइसकेका छन् । यता रोहितले पनि इन्डोनेसिया डर्बीमा गोल गरेका थिए । यद्यपी उनको टोलीले जित दर्ता गर्न भने सकेन ।

नेपाली टोलीका कार्यवाहक प्रशिक्षक बालगोपाल महर्जनले यी दुई खेलाडीको स्थानमा राष्ट्रिय टोलीबाट डेब्यु गर्न बाँकी रहेका दुई खेलाडीलाई टोलीमा समेटेका छन् । गोलरक्षकमा मनाङ मर्स्याङदी क्लबमा आबद्ध रहेका विशाल श्रेष्ठ टोलीमा आएका छन् । नेपाल पुलिस क्लबका मिडफिल्डर तेज तामाङले रोहित को स्थान लिनेछन् । दुवै खेलाडी यसअघि एन्फाले साफका लागि घोषणा गरेको प्रारम्भिक टोलीमा समावेश थिए ।

साफको तुलनामा नेपाली टोली केहि कमजोर नै देखिन्छ । किरणको अनुपस्थितिमा विकेश कुथु र एलन न्यौपानेमध्ये एकले गोलपोस्ट सम्हाल्नेछन् । त्यस्तै मिडफिल्डमा भने विशाल राईले सुरुआती रोजाइमा स्थान बनाउने प्रबल सम्भावना छ । साफ च्याम्पियनसिपको कुनै खेलमा मैदान प्रवेश गर्न नपाएका हेमन गुरुङ र हेमन्त थापामगर पनि आफ्नो स्थान बनाउने सुरमा हुनेछन् । तेज आफैं पनि मिडफिल्डमा केहि जिम्मवारी बहन गर्ने अवस्थामा हुन सक्छन् ।

नेपालले प्रतियोगिताको पहिलो खेलमा ताजिकिस्तानको सामना गर्दा जितको लक्ष्य लिएर मैदान उत्रने कप्तान विराज महर्जनले बताएका छन् । बिराज आफू सुरुआती रोजाईमा पर्ने सम्भावना पनि निकै कम छ । उनको स्थानमा दिनेश राजवंशीले पछिल्लो केहि खेल खेलेका थिए । डिफेन्समा अनन्त र आदित्यको जोडीलाई देवन्द्र तामाङले तोड्ने प्रयास गर्नेछन् । अर्को डिफेन्सका रुपमा सुमन अर्याल रहने छन् ।

तस्बिर : विवेक सुवेदी / हाम्रो खेलकुद

नेपालको आक्रमणको जिम्मेवारी भरत खवास, नवयुग श्रेष्ठ र विमल घर्तिमगरको काँधमा छ । अन्जन विष्टलाई पनि प्रशिक्षकले चाहेको खण्डमा आक्रामक भूमिकामा उतार्न सक्छन् । सुनील बल पनि साफ च्याम्पियनसिपको प्रदर्शन दोहोर्याउने प्रयासमा हुनेछन् । दायाँ मिडफिल्डमा सुजल श्रेष्ठले नै सुरुआत गर्ने प्रबल सम्भावना छ ।