काठमाडौं (हाम्रो खेलकुद)– चोटमुक्त भएर मैदान फर्कने क्रममाा रहेका रुस्लान थ्री स्टार क्लबका कप्तान विक्रम लामाले बैंकक एडेमी अफ स्पोर्टस एन्ड एक्सरसाइज मेडिसनमा आफ्नो परिक्षण गराएका छन् । परिक्षणका क्रममा शल्यक्रिया गरिएको घुँडाको हड्डीमा कुनै समस्या नरहेको विक्रमले हाम्रो खेलकुदलाई जानकारी दिएका छन् ।

बैंककमा रुस्लान थ्री स्टार क्लबका उपाध्यक्ष अतिशकृष्ण श्रेष्ठ (बायाँ) का साथ विक्रम लामा ।

‘सबै परिक्षणमा राम्रो छ । हड्डीमा कुनै समस्या छैन । अब मैले मसल बलियो बनाउनका लागि केहि मेहनत गर्नुपर्ने भनिएको छ,’ विक्रमले भने,‘ त्यसपछि म मैदानमा जान सक्छु । अनि मैले २/३ साता प्रशक्षण गर्नुपर्ने हुन्छ । ’

उनले अझै केहि दिन बैंककमै रहने जानकारी दिदै भने, अहिले जिम, पौडी र दौड गराइरहनु भएको छ । परिक्षणका लागि विक्रम असोज १२ गते बैंकक गएका थिए । फागुन २७ गते धरानमा बुढासुब्बा गोल्डकपको फाइनलका दौरान दायाँ खुट्टा भाचिएपछि उनी मैदान बाहिर रहँदै आएका छन् ।

फागुन २८ गते चक्रराज पाण्डेको नेतृत्वमा ग्रान्डी अस्पताल उनको खुट्टाको शल्यक्रिया भएको थियो । शल्यक्रियापश्चात अहिले पनि उनको खुट्टामा स्टिल छ । क्लबका उपाध्यक्ष अतिशकृष्ण श्रेष्ठको पहलमा उनी बैंकक अस्पतालमा परिक्षणका लागि गएका हुन् । थाइल्यान्डबाट फर्केपछि विक्रमले लिग खेल्ने सम्भावना छ ।

उनकै कप्तानीमा क्लबले मोफसलका विभिन्न उपाधि जित्नुका साथै दुई वर्षअघि एएफसी कपको छनोट चरण पनि पार गरेको थियो । तर एन्फाको लापरवाहीका कारण क्लबले दोस्रो चरण भने खेल्न पाएको थिएन । विक्रमले एसियन कप छनोट दौरान राम्रो प्रदर्शन गरेका थिए । सन् २०१३ र २०१५ को साफ च्याम्पियनसिप खेलेका विक्रमले यस पटक बंगलादेशमा भएको साफ च्याम्पियनसिप गुमाएका थिए ।