मस्को (एजेन्सी) – च्याम्पियन्स लिग अन्तर्गत समूह ‘जी’ को खेलमा मंगलबार रियल म्याड्रिड सीएसकेए मस्कोसँग पराजित भएको छ । लगातार तेस्रो च्याम्पियन्स लिग उपाधि जितेर चौथो उपाधि पछ्याइरहेको रियलले १५ वर्षदेखि मस्कोमा कुनै खेल जित्न सकेको छैन ।

रियलले पछिल्लोपटक सन् २००३ मा जित दर्ता गरेको थियो । त्यसबेला कालो पन्जा र सेतो बुट लगाएका ब्राजिलियन रोनाल्डोले गोल गर्दै रियललाई जित दिलाएका थिए । त्यसबेला लुइस फिगोको क्रसमा हेडरमार्फत गोल गरेको क्षण धेरै रियल समर्थकलाई याद छ । त्यसयता रियलले मस्कोमा जित दर्ता गर्न सकेको छैन ।

मंगलबार इंग्लिस क्लब एभरटनबाट लोनमा मस्को पुगेका फरवार्ड निकोला भ्लासिचले गरेको गोल निर्णायक सावित भएको हो । यस पराजयसँगै रियलले पछिल्लो तीन खेलमा जित दर्ता गर्न सकेको छैन । सन् २००७ यता पहिलोपटक रियलले लगातार तीन खेलमा गोल गर्न नसकेको हो । फरवार्ड क्रिस्टियानो रोनाल्डो क्लब छाडेर जानु र ग्यारेथ बेल चोटका कारण टोलीमा नहुँदा रियलको आक्रमण फितलो देखिएको थियो । अर्का मिडफिल्डर इस्को पनि एपेन्डिक्सका कारण उपलब्ध नहुँदा रियल समस्यामा पारेको हो ।

मस्कोले टोनी क्रुसको मिसपासलाई सदुपयोग गर्दै खेलमा अग्रता लिएको थियो । मिडफिल्डमा निकै प्रभावशाली प्रदर्शन गरेका क्रुसले सानो गल्ति गर्दा भ्लासिचले त्यसको भरपुर फाइदा उठाए । पछिल्लो सिजन एभरटनका लागि १९ खेल खेलेका फरवार्ड भ्लासिच सिजनको सुरुआतमा मस्को पुगेका थिए । उनले रियलविरुद्ध गोल गरेर जित दिलाउँदै समूहको समीकरण खुला पारेका छन् ।

खेलको सुरुआती मिनेटमा क्रुसले डिफेन्सबाट आएको बललाई त्यसैतर्फ फिर्ता दिन खोज्दा भ्लासिचले बल रोक्दै गोल गर्न सफल रहेका थिए । क्रुसको पास उनको खुट्टामा परेपछि भ्लासिचले एक टच गोलतर्फ बढाउँदै केलर नाभासलाई बचाउने कुनै मौका दिएनन् । पछाडी परेको केहि बेरमै रियलले खेल बराबरी गर्ने मौका पाएको थियो । तर क्रुसको प्रहारलाई गोलरक्षक इगोर अकिन्फीभले विफल तुल्याए ।

रियलले खेलदौरान दुई पटक पोस्टमा प्रहार गर्यो । मिडफिल्डर क्यासेमिरोले गरेको लामो दुरीको प्रहार पोस्टमा लागेको थियो भने फरवार्ड करीम बेन्जेमाको हेडर क्रसबारमा लाग्दै बाहिरिएको थियो । यद्यपी गोल गर्ने सुरमा आक्रामक देखिएको म्याड्रिड पटक पटक काउन्टर अट्याकमा पनि फसेको थियो । मस्कोका फेडोर सलोभले दुई पटक अवसर सदुपयोग गर्न नसक्दा अग्रता बढ्न सकेन । बल पोसेसनमा बलियो पकड बनाएको रियलले कुनै समय गल्ति गर्दा मस्कोको टोलीले सक्दो चाँडो काउन्टर अट्याकमा जाने रणनीति बुनेको थियो ।

एक गोलले पछाडी पाएको रियललाई पहिलो हाफको अन्त्यतिर थप समस्या पर्यो । डिफेन्डर ड्यानी कार्भाजल चोटका कारण मैदान बाहिरिनु पर्यो । यसैपनि सर्जियो रामोस, इस्को र बेलबिना उत्रिएको म्याड्रिडले निकै संघर्ष गर्नुपर्यो । मार्को एसेन्सियोले केहि अवार पाएपनि गोलरक्षकलाई बिट गर्न सकेनन् । अकिन्फीभले ड्यानी सेबालोसको प्रहार पनि बचाएका थिए ।