काठमाडौं (हाम्रो खेलकुद) – ओलम्पिक छनोटमा भाग लिन नेपाली महिला राष्ट्रिय फुटबल टोली शुक्रबार चीनबाट म्यानमार पुग्दैछ । छनोटको तयारीका लागि नेपाली टोली तीन वटा मैत्रीपूर्ण खेल खेल्नका लागि अघिल्लो साता चीन पुगेको थियो । बेजिङ फोनिक्ससँगको २ खेल ४–१ र २–१ ले गुमाएको नेपाली टोलीले बेजिङ युनिभर्सिटीलाई भने ३–१ हराएको थियो ।

नेपाल सम्मिलित ओलम्पिक छनोटको समूहमा भारत, म्यानमार र बंगलादेश रहेका छन् । नेपालले नोभेम्बर ८ मा भारत, ११ मा म्यानमार र १३ मा बंगलादेशसँग प्रतिस्पर्धा गर्ने बताइएको छ । नेपालले पहिलो पटक ओलम्पिकको महिला फुटबल छनोटमा भाग लिन लागेको हो ।

हरि खड्काको मुख्य प्रशिक्षणमा रहेको नेपाली टोलीको अर्को प्रशिक्षक मृगेन्द्र मिश्र छन् र हिराचन थकाली व्यवस्थापक छिन् ।अहिले चीन यात्रामा रहेका मध्ये ५ खेलाडी स्वदेश फर्कनेछन् भने यू १९ का ३ खेलाडी म्यानमार पुग्ने अखिल नेपाल फुटबल संघ (एन्फा) ले जनाएको छ ।

यू १९ का तीन खेलाडी अन्जना रानामगर, सरु लिम्बु र मञ्जली कुमारी योञ्जन राष्ट्रिय टोलीमा आबद्ध हुन शुक्रबार म्यानमार जानेछन् । आजै चीन यात्रामा रहेका मध्येका पाँच खेलाडी लिला लाम्काडे, इन्दिरा राई, शर्मिला थापा, मेनुका गिरी र दीपा अधिकारी स्वदेश फर्कनेछन् ।