एजेन्सी – बार्सिलोनाका कप्तान लिओनेल मेसी ला लिगाअन्तर्गत शनिबार हुने बार्सिलोना र रायो भालेकानोबीच हुने खेलको सम्भावित टोलीमा परेका छैनन् । उनीसँगै ब्राजिलियन विंगर माल्कम पनि टोलीमा समावेश भएका छैनन् ।

अक्टोबर २० मा सेभिल्लाविरुद्ध खेल्दा हातमा चोट बोकेपछि मेसी मैदान बाहिर नै छन् । यद्यपी उनले केहि दिनयता प्रशिक्षणमा भने सहभागिता जनाइसकेका छन् । ‘ अहिले अलि हतार हुन्छ । उनी अझै ठिक हुने प्रक्रियामा छन्,’ प्रशिक्षक एर्नेस्टो भालभेर्डेले शुक्रबार पत्रकार सम्मेलनमा भने । उनले मंगलबार हुने च्याम्पियन्स लिगको इन्टरविरुद्ध खेलमा भने उनको सम्भावना रहेको बताए । त्यसका लागि आवश्यक परिक्षण गरेर खेल अघि फिटनेस टेस्ट लिएपछि मात्र उनको अवस्थामा निर्णय लिइने बुझिएको छ ।

मेसीको अनुपस्थितिका बाबजुद प्रशिक्षक एर्नेस्टोले ब्राजिलियन माल्कमलाई टोलीमा नसमेट्ने निर्णय लिएका छन् । माल्कमले बुधबार कल्चरल लिओनेसाविरुद्ध १-० को जितमा बार्सिलोनाको लागि सुरुवाती रोजाइमा रहेर डेब्यु गरेका थिए । उनीसँगै डेनिस सुआरेजले पनि टोलीमा स्थान बनाउन सकेनन् । यद्यपी युवा खेलाडी कार्लोस एलेना र चुमी भने टोलीमा समावेश छन् । बुधबारको खेलमा चोट बोकेका सर्जी साम्पर उपलब्ध छैनन् भने डिफेन्डरद्वय स्यामुएल उम्टिटी र थोमस भर्मालेन चोटका कारण मैदानबाहिर नै छन् ।