ललितपुर (हाम्रो खेलकुद)– ललितपुर महानगरपालिकाले आफ्नो क्षेत्र भित्र रहेका ए,बी र सी डिभिजन क्लबलाई फुटबल विकासमा लागि परेको भन्दै प्रोत्साहन रकम प्रदान गरेको छ ।

ललितपुरमा ५ ए डिभजिन, ४ बी डिभिजन र २ सी डिभिजन क्लब रहेका छन् । ए डिभिजनलाई बार्षिक ४ , बी लाई ३ र सी लाई २ लाख रुपैयाँ महानगरपालिकाले शनिबार एक कार्यक्रम आयोजना गर्दै प्रदान गरेको छ । ललितपुर महानगरपालिकाका मेयर चिरीबाबु महर्जन र सम्बन्धित क्लबका अध्यक्षहरुले सम्झौता पत्रमा हस्ताक्षर गरेका थिए ।

सोही अवसरमा गत वर्ष नकआउटका ११ वटा फाइनल खेल्दै ७ उपाधि जितेको रुस्लान थ्री स्टारलाई प्रत्येक उपाधिको ४ लाखका दरले थप २८ लाख रुपैयाँ प्रदान गरेको थियो । एउटा क्लबलाई मात्र नीतिगत निर्णय विना अधिक धनराशी दिएको देखिएकोले भन्दै बाँकी ४ वटा ए डिभिजन क्लबले भने कार्यक्रम बहिष्कार गरेका छन् । बहिष्कार गर्नेमा जालाखेल युथ क्लब, फ्रेन्ड्स क्लब, च्यासल क्लब र ब्रिगेड ब्वाइज क्लब रहेका छन् ।

महानगरपालिकाले थ्री स्टालाई फुटबलका माध्यमबाट जिल्ला र देशको प्रतिष्ठा बढाउन भूमिका निर्वाह गरेको भन्दा विशेष सम्मान गरेको थियो । ३ पटकका सहिद स्मारक ए डिभिजन लिग च्याम्पियन थ्री स्टारले एक पटक राष्ट्रिय लिगको उपाधि जितेको थियो । देश भित्र आयोजना हुने अधिकांश नकआउट प्रतियोगिता पनि थ्री स्टारले जितिसकेको छ ।

ललितपुर महानगरपालिकाका मेयर चिरीबाबु महर्जनले नगद परिषद्ले नीतिगत निर्णय गरेर क्लबहरुलाई प्रोत्साहन रकम प्रदान गरेको बताएका छन् । ‘थ्री स्टारलाई मात्र धेरै रकम दियौ भन्ने उहाँहरुको भनाई देखियो,’उनले भने, ‘ तर त्यस्तो होइन, नीतिगत निर्णय सबै क्लबका लागि हो । आउने दिनमा अरु ए डिभिजन क्लबले जित्दा पनि प्रत्येक उपाधिको ४ लाख रुपैयाँका दर पुरस्कार दिन्छौं । यो महनगरपालिकाको रातो किताबमा उल्लेख भइसकेको छ ।’

मेयर महर्जनले ए डिभिजनका अन्य क्लबलाई प्रोत्साहन रकम लिएर जान आग्रह समेत गरेका छन् । ‘उहाँहरुका लागि हाम्रो ढोका सधै खुला छ ,’ उनले भने,‘ महानगरको इतिहासमा यो क्लबहरुलाई प्रोत्साहन रकम दिन सुरु भएको छ । भविष्यमा यसलाई अझै परिमार्जित गर्दै लैजान हामी तयार छौं । ’

राष्ट्रिय खेलकुद परिषद (राखेप) का सदस्य सचिव केशवकुमार विष्टले महानगरपालिकाको कदमको सरहाना गर्दै क्लबहरुलाई रकम बुझ्न आग्रह गरेका थिए । ‘यो अन्यन्तै सकारात्मक कदम हो,’ उनले भने,‘क्लबहरुले यसलाई सकारात्मक रुपमा लिनुपर्दछ । ’

अखिल नेपाल फुटबल संघ (एन्फा) का अध्यक्ष कर्मा छिरिङ शेर्पाले क्लबहरुलाई सहयोग गरेकोमा महानगरपालिकाका लागि धन्यवाद दिदै फुटबलका लागि एउटा रंगशाला निर्माणका लागि पनि आग्रह गरेका छन् । क्लबका तर्फबाट बोल्दै थ्री स्टारका कार्यवहाक अध्यक्ष अरुणमान जोशीले महानगरपालिकाको प्रत्साहनले फुटबल विकासमा अझै लागि रहन प्रेरणा मिलेको बताएका छन् ।