काठमाडौं (हाम्रो खेलकुद)– बंगलादेशले साफ यू १५ च्याम्प्यिनसिप फुटबलको उपाधि जितेको छ । सातदोबाटोस्थित एन्फा कम्प्लेक्समा शनिबार भएको फाइनलमा पाकिस्तानलाई टाइब्रेकरमा ३–२ ले हराउँदै बंगलादेशले उपाधि जितेको थियो ।

निर्धारित समयमा १–१ को बराबरीमा टुंगिएपछि टाइब्रेकरमा बंगलादेशले बाजी मारेको थियो । बंगलादेशले सेमिफाइनलमा पनि टाइब्रेकरमा जितेको थियो ।पाकिस्तानका कप्तान हासिब अहमद खानको आत्मघाती गोलमा २५ औं मिनेटमा बंगलादेशले खेलमा अग्रता लिएको थियो ।

५५ औं मिनेटमा पाकिस्तान खेललाई बराबरीमा ल्याउन सफल भएको थियो । मोहम उल्लाहले प्राप्त पेनाल्टीलाई गोलमा परिणत गर्दै खेललाई बराबरीमा पु¥याएका थिए । बंगलादेशका खेलाडीले विपक्षी खेलाडीलाई पेनाल्टी बक्समा फाउल गरेपछि पाकिस्तानले पेनाल्टी पाएको थियो ।

त्यसअघि नेपालले चौथो स्थानमा च्याम्पियनसिपको अन्त्य गरेको थियो । तेस्रो स्थानका लागि शनिबार भएको खेलमा भारतसँग १–० ले पराजित भएपछि नेपाली टोली चौथो स्थानमा समित भएको हो । खेलको १८ औं मिनेटमा थलेचु बनलरुटफेलाको गोलमा विजयी हुँदै भारतले तेस्रो स्थान प्राप्त गरेको थियो ।

दुई दिनअघि सोही मैदानमा भएको सेमिफाइनलमा नेपाली टोली पाकिस्तानसँग ४–० को फराकिलो अन्तरले पराजित भएको थियो । अर्को सेमिफाइनलमा भारत बंगलादेशसँग टाइब्रकेरमा पराजित भएको थियो ।