लन्डन (एजेन्सी)– चेल्सीका स्टार इडन हाजार्डले आफु स्टामफोर्ड ब्रिजमै खुसी रहेको उल्लेख गर्दै विश्व कपका कारण केहि थकित महसुस गरिरहेको बताएका छन् । यद्दपी विश्व कपअघि देखि नै उनीले यो सिजन चेल्सी छाड्ने चर्चा चलिरहेको थियो । उनले पनि समय समयमा नयाँ क्लब जान चाहेको संकेत गरेका थिए ।

हाजार्डले रियल म्याड्रिड आफ्नो सपनाको क्लब भएको बताउँदै आएका छन् । क्रिस्टियानो रोनाल्डोले सिजनको सुरुवातमा रियल छाडेपछि त्यो क्लबले भित्राउन चाहेका मध्ये हाजार्ड पनि भएको बताइएको थियो । यद्दपी यी सबै चर्चाका बीच आफु चेल्सीमै खुसी रहेको बताएका छन् । उनले अहिले क्लब छाड्ने कुनै योजना नरहेको पनि प्रष्ट पारेका छन् ।

‘पछिल्लो सात वर्षदेखि म चेल्सीमा छु । मैले यहाँ जहिले पनि रमाइलो महसुस गरेको छु,’ हाजार्डले भनेका छन् , ‘म मैदानमा जहिले पनि खुसी हुने कोसिस गर्छु । पहिला आफै र त्यसपछि खेल हेरिरहेका समर्थकलाई खुसी पार्ने प्रयास गर्छु । अहिलेको क्षणमा हामीले राम्रो गरिरहेका छौं, मैले पनि राम्रै गरेको छु । त्यसैले पनि म यो समय खुसी छु । ‘

प्रिमियर लिगमा अहिले राम्रो गरिरहेको उल्लेख गरेका हाजार्डले प्रतियोगिताको व्यस्त तालिकाबाट अझै ठिक हुन नसकेको बताएका छन् । ‘विश्वास गर्नुस् म थकित छु । तर पनि म खेल्नका लागि ठिक छु, गत सिजन गोलीगाँठाको चोटका कारण तीन महिना आराम गरे । तर अहिले म ठिक छु, ‘२७ वर्षे हाजार्डले भने,’ हामी मैदानमा जति बेला खुसी हुन्छौं केहि न केहि राम्रो गर्ने कोशिस गरिरहेका हुन्छौं । म आफैमा रमाइरहेको छु । ‘

यो सिजन चेल्सीका लागि ११ खेलमा उनले ७ गोल गरिसकेका छन् । लिगमा उनी उच्च गोलकर्ताको दोस्रो स्थानमा छन् । म्यानचेस्टर सिटीका सर्जियो अगुइरो ८ गोलसहित प्रिमियर लिगको शीर्षस्थानमा छन् ।