काठमाडौं (हाम्रो खेलकुद) – टोकियो ओलम्पिक २०२० महिला फुटबल अन्तर्गत एएफसीको प्रारम्भिक छनोट प्रतियोगितामा मंगलबार दिउँसो नेपाल र बंगलादेश भिड्दैछन् । बंगलादेशलाई पराजित गरे नेपालले छनोटको दोस्रो चरणमा प्रवेश पाउनेछ । पहिलो सहभागितामै नेपालले छनोटको दोस्रो चरणको यात्रा तय गर्न लागेको हो । खेल नेपाली समयानुसार दिउँसो २:१५ बजे हुनेछ ।

हालसम्म सम्पन्न प्रतियोगिताको खेलमा नेपालले भारत र म्यानमारसँग १-१ को बराबरी गर्दै उत्कृष्ट सुरुवात लिएको छ । अन्य खेलमा भने बंगलादेशले पहिलो खेलमा म्यानमारसँग ५-० र भारतसँग ७-१ को भारी अन्तरले हार बेहोरेको छ । यस नतिजासँगै म्यानमार २ खेलमा ४ अंक जोड्दै तालिकाको शीर्ष स्थानमा छ । समान अंक बोकेको भारत गोलअन्तरमा दोस्रो छ भने नेपाल तेस्रो स्थानमा छ । अंकविहिन बंगलादेश पुछारमा छ ।

नेपालले यसअघिका दुवै खेलमा अग्रता लिनुका बाबजुद गोल खाँदै बराबरी नतिजामा चित्त बुझाउनु परेको छ । भारतविरुद्ध कप्तान निरु थापाले ११ औं मिनेटमा गोल गर्दा कमला देवीले ३७ औं मिनेटमा बराबरी गोल फर्काइन् । दोस्रो खेलमा दोस्रो मिनेटमा नै सावित्रा भण्डारीको पेनाल्टी गोलमा अग्रता लिएको थियो । तर त्यसको १० मिनेट नबित्दै गोलरक्षक एन्जिला तुम्बापो सुब्बाले कर्नरमा आएको बललाई रोक्न नसक्दा म्यानमारले बराबरी गोल फर्कायो ।

खेलको पूर्वसन्ध्यामा हाम्रो खेलकुदसँग बोल्दै नेपाली महिला राष्ट्रिय फुटबल टोलीका प्रशिक्षक हरि खड्काले टोलीको मनोबल उच्च रहेको बताए ।  ‘ भारत र म्यानमार बलिया टोली हुन् ।  दुवै टोलीलाई हामीले बराबरीमा रोक्न सफल भयौं ।  हाम्रो योजना प्रत्यक खेलमा सफल भएको छ । दुवै खेलमा हामीले अग्रता कायम गर्यौं, यसले टोलीको मनोबल बढेको छ,’ प्रशिक्षक खड्काले भने ।  नेपालले पहिलो खेलमा भारत र दोस्रो खेलमा म्यानमारलाई १-१ को बराबरीमा रोकेको थियो । दुवै खेलमा नेपालले अग्रता लिएपनि पहिलो हाफमा नै बराबरी गोल पनि खाएको थियो ।

पछिल्लो खेलमा आक्रमणमा पाएको अवसर सदुपयोग गर्न नसकेपनि प्रशिक्षक खड्काले त्यसबारे चिन्ता नरहेको बताए । ‘ भारतविरुद्ध हाम्रो अग्रपंक्तिले राम्रो प्रदर्शन गरेको थियो । गोल पनि समयमै निस्केको थियो ।  म्यानमारविरुद्ध पनि सुरुवात उत्कृष्ट रहयो ।  सावित्राले पहिलो मिनेटमा नै डिफेन्सलाई समस्यामा पारिन् । तर त्यसपछि म्यानमारले डिफेन्समा थप कडाइ गरेपछि हाम्रो योजना सफल भयो,’ उनले थपे,’ हामीले काउन्टरमा केहि राम्रो अवसर सिर्जना पनि गर्यौं ।  म्यानमार जस्तो बलियो टोलीलाई हामीले केहि दबाबमा राख्नु राम्रो संकेत हो ।’

बंगलादेशविरुद्ध टोलीको लक्ष्य ३ अंक रहने उनले स्पष्ट पारे । ‘ हामी जित दर्ता गरे अर्को चरणमा पुग्नेछौं ।  भारत र म्यानमारले बंगालदेशविरुद्ध फराकिलो जित दर्ता गरेका छन् । हामी ३ अंक हासिल गर्ने लक्ष्य लिएर मैदानमा उत्रनेछौं,’ प्रशिक्षक खड्काले भने, ‘ हामीले बल पोसेसन राखेर राम्रो फुटबल खेलेका छौं ।  बंगलादेशविरुद्ध पनि त्यहि योजना हुनेछ ।  राम्रो फुटबल खेलेपछि गोल निस्कन्छ र नतिजा पनि । हामी स्पष्ट जितको लक्ष्य लिएर अगाडी बढ्नेछौं ।’

ओलम्पिक छनोटमा भारतविरुद्ध गोल गरेपछि निरु थापा

नेपालले अग्रता लिएपनि त्यसलाई बचाउन नसक्दा ओलम्पिक छनोटमा जित दर्ता गर्न सकेको छैन । आक्रमणमा पाएको अवसर चुकाउँदा पनि नेपाल जितविहिन हुनु पारेको हो । यद्यपी भारत र म्यानमार नेपालभन्दा बलिया टोली हुन् । दुवै खेलमा बराबरी हुँदा पनि नेपालको छनोट हुने सम्भावना बलियो नै रहेको छ । अन्तिम खेलमा नेपालले बंगलादेशलाई पराजित गरेमात्र पनि दोस्रो चरणमा पुग्नेछ ।

प्रत्यक समूहको शीर्ष २ टोली र तेस्रो हुने उत्कृष्ट दुई टोली दोस्रो चरणमा छनोट हुने एन्फाले जनाएको छ । यससँगै नेपालले बंगालदेशलाई पराजित गरेमा शीर्ष दुई अथवा तेस्रो स्थानको उत्कृष्ट दुईमा पर्ने पक्का भएको छ । बंगलादेशलाई हराए नेपाललाई समूह उपविजेता बन्न म्यानमार र भारतको खेलमा जित-हारको नतिजा आउनुपर्ने आवश्यकता छ भने भारत-म्यानमार गोलरहित बराबरी भएको खण्डमा नेपाल समूह विजेता हुनेछ । तर नेपालले बंगलादेशलाई भने पराजित गर्नैपर्छ । बंगलादेशले पनि नेपाललाई पराजित गरे दोस्रो चरणमा पुग्ने सम्भावना रहन्छ ।

सन् २०२० मा हुने टोकियो ओलम्पिक छनोटमा १८ देशको सहभागिता छ । सहभागी टिमलाई ४ समूहमा विभाजन गरिएको छ । भिएतानाम र उज्जेकिस्तान वरियताका आधारमा दोस्रो चरणका लागि छनोट भैसकेका छन् । हरेक समूहका शीर्ष दुई टोली र अन्य दुई उत्कृष्ट तेस्रो हुने टोली दोस्रो चरणमा प्रवेश गर्नेछन् । दोस्रो चरणका खेलहरु अप्रिलमा हुनेछ ।

दोस्रो चरण छनोटबाट तीन टोली तेस्रो चरणमा प्रवेश गर्नेछन् । तेस्रो चरणमा ८ टिमबीच प्रतिस्पर्धा हुनेछ । दोस्रो चरणका तीन विजेतासँगै अष्ट्रेलिया, चीन, थाइल्याण्ड, दक्षिण कोरिया र उत्तर कोरियाले तेस्रो चरणमा प्रतिस्पर्धा गर्नेछन् । दुई समूहका उत्कृष्ट दुई टोलीले चौथो चरणमा स्थान बनाउनेछन् । चौथो चरण प्रवेश गर्न सफल चार टोलीलाई दुई समूहमा विभाजन गरी होम एण्ड अवेको आधारमा प्रतिस्पर्धा गराइनेछ । जसबाट विजयी हुने दुई टिम ओलम्पिकका लागि छानिनेछन् ।