एजेन्सी – प्रशिक्षक जुलेन लोपेटेगुईलाई बर्खास्त गरेपछि कार्यवाहकको भूमिका निर्वाह गरेका सान्टियागो सोलारी नै रियलको पूर्ण प्रशिक्षकमा नियुक्त हुने भएका छन् ।

स्पेनिस लिगको नियमअनुसार दुई सातासम्म मात्र कार्यवाहकको भूमिकामा बस्न सकिने प्रावधान छ । रियलले आइतबार राती सेल्टा भिगोविरुद्ध जित दर्ता गरेसँगै सोलारीको नयाँ सम्झौता स्पेनिस फुटबल महासंघलाई बुझाइसकेको मार्साले जनाएको छ । क्लबले अब छिट्टै औपचारिक कार्यक्रम गरेर उनलाई पूर्ण प्रशिक्षकको पदमा नियुक्त गरेको सार्वजनिक गर्नेछ ।

लोपेटेगुईले एल क्लासिकोमा बार्सिलोनाविरुद्ध ५-१ को लज्जास्पद हार बेहोरेपछि जागिर गुमाएका थिए । उनको स्थानमा आएका सोलारीले भने ४ खेलमा शत प्रतिशत जितको नतिजा हात पारेका छन् । उनले यसक्रममा मेलिला, रियल भालाडोलिड, भिक्टोरिया प्लेजन र सेल्टा भिगोलाई पराजित गरे । यसक्रममा क्लबले १५ गोल पनि गरिसकेको छ ।

रियलको लागि पछिल्लो १ सय १६ वर्षमा नयाँ प्रशिक्षकको लागि यो उत्कृष्ट सुरुवात पनि हो । रियलले लगातार जितको नतिजा कायम राख्ने लक्ष्यसहित सोलारीलाई जिम्मेवारी सुम्पिएको हो । लोपेटेगुईको आगमनसँगै रियलको नतिजा निकै खराब भएको थियो । लिगको आठौँ स्थानमा पुगेको रियलले सोलारीको आगमनपछि भने निकै राम्रो प्रदर्शन गरिरहेको छ ।