काठमाडौं (हाम्रो खेलकुद) – पल्सर सहिद स्मारक ए डिभिजन लिग अन्तर्गत शनिबारको दोस्रो खेलमा त्रिभुवन अार्मी क्लबले च्यासल युवा क्लबलाई १-० ले पराजित गरेको छ ।

अार्मीका लागि युवा डिफेन्डर विकास खवासले अग्रता दिलाए । उनले सन्तोष तामाङको कर्नरमा २७ अौं मिनेटमा हेडरमार्फत गोल गरेका थिए । खेलमा अार्मीले दवाव बनाएपनि गोल थप्न भने सकेन । च्यासलले पनि काउन्टरमा केहि अवसर सिर्जना गरेको छ ।

१४ अौं मिनेटमा च्यासलका अमिर श्रेष्ठको प्रहार गोलरक्षक विकेश कुथुले पन्च गरेका थिए । त्यसयता च्यासलको प्रहारले पोस्टको दिशा दिन सकेको छैन । अार्मीका लागि भने सन्तोषको फ्रिकिक गोलरक्षक दिनेशले बचाएका थिए ।

पहिलो हाफको अन्त्यतिर कप्तान भरत खवासले अग्रता दोब्बर पार्ने अवसर गुमाए । पेनाल्टी क्षेत्रभित्रबाट उनले गरेको प्रहारले पोस्टको दिशा लिन सकेन । अार्मीले पहिलो हाफमा १-० को अग्रता लिएको थियो ।

दोस्रो हाफको सुरुवातमै च्यासलले अवसर सिर्जना गरेको थियो । सन्तोष साहुखलको फ्रिकिकलाई ४९ अौं मिनेटमा विकेशले पन्च गरिदिए । ७८ अौं मिनेटमा सन्तोषकै हेडरलाई विकेशले सुन्दर बचाउ गर्दै अग्रता कायम राखे ‌। त्यसबीचमा अार्मीले अग्रता दोब्बर पार्ने अवसर चुकायो ।

अार्मीले ६४ अौं मिनेटमा अग्रता दोब्बर पार्ने अवसरको सदुपयोग गर्न सकेन । गोलरक्षक बिट भइसकेको अवस्थामा दीनेश हेन्जनको प्रहारलाई च्यासलका कप्तान देवेन्द्र तामाङले गोललाइनबाट बचाए । त्यसको पाँच मिनेटपछि दीनेशकै हेडरलाई अर्का डिफेन्डर गौरव बुढाथोकीले गोललाइनबाट बचाए ।

जितसँगै अार्मीले लिगमा पहिलो जित दर्ता गरेको छ । अार्मीको २ खेलमा ४ अंक छ भने च्यासलको २ खेलमा १ अंक छ ।