काठमाडौं (हाम्रो खेलकुद) – प्रवीन स्याङतानले खेलको अन्तिम समय गोल गरेपछि पल्सर सहिद स्मारक ए डिभिजन अन्तर्गत दोस्रो खेलमा एपीएफले फ्रेन्ड्स क्लबलाई १-० ले पराजित गरेको छ ।

एपीएफका लागि खेलको १३ औं मिनेटमा रुपबहादुर लामाले गरेको प्रहार बंगलादेशी गोलरक्षक मोहमद नुरुल करीमले बचाए । लगत्तै प्रवीन स्याङतानको प्रहार पनि उनैले विफल तुल्याए । फ्रेन्ड्सले पनि पहिलो हाफमा अवसर प्राप्त गरेको थियो फोफानाको प्रहारलाई गोलरक्षक राजु योगीले सहजै बचाए । पहिलो हाफमा खेल गोलरहित बराबरीमा टुंगियो ।

दोस्रो हाफमा फ्रेन्ड्सले आक्रामक सुरुवात गर्यो । फोफानाले पेनाल्टी क्षेत्रभित्रबाट गरेको प्रहारलाई गोलरक्षक योगीले बचाए । एपीएफले पुन लय समात्दै एक माथि अर्को आक्रमण बुन्यो । ५७ औं मिनेटमा फ्रेन्ड्सको डिफेन्सको गल्तीमा एपीएफका प्रवीनले वन भर्सेस वनमा गोल गर्न सकेनन् ।

खेलको ७५ औं मिनेटमा विश्वास उदासको फ्रिकिकमा राजेन्द्र रावलको हेडर क्रसबारभन्दा थोरै माथिबाट बाहिरियो । त्यसको केहिबेरमै राजेन्द्रको हेडर गोलपोस्टमा छिरेपनि रेफ्रीले त्यसलाई अफसाइड करार दिए । खेल बराबरीतर्फ उन्मुख हुँदै गर्दा इन्ज्युरी समयमा प्रवीनले गोल गर्दै एपीएफको जित पक्का गरे ।

यो एपीएफको जारी लिगमा पहिलो जित हो । पहिलो खेलमा बराबरी खेलेको एपीएफले २ खेलमा ४ अंक जोडेको छ । फ्रेन्ड्स भने लगातार दोस्रो खेलमा पराजित हुँदै अंकविहिन रहेको छ ।