काठमाडौं (हाम्रो खेलकुद) – नेपालले सन् २०१९ मा महिला साफ च्याम्पियनसिपको पाँचौ संस्करण आयोजना गर्ने पक्का भएको छ । नेपाल यसअघी तीन पटक फाइनल र पछिल्लो संस्करणमा सेमिफाइनलसम्म पुगेको थियो ।

मंगलबार दक्षिण एसियाली फुटबल फेडेरेसन (साफ) ले नेपाललाई आयोजनाको जिम्मेवारी सुम्पिएको हो । प्रतियोगिता ११ देखि २१ मार्च २०१९ सम्म विराटनगरमा हुनेछ । प्रतियोगितामा सहभागी हुने टोलीको संख्या भने यसै महिनाको अन्त्यसम्म तय हुनेछ । साफले यसअघि डिसेम्बर तेस्रो सातालाई तोकेको साफ च्याम्पियनसिपको मिति श्रीलंकाले आयोजना गर्न असमर्थ भएपछि सारिएको हो ।

नेपालले विराटनगरमा आयोजना गर्ने प्रस्ताव साफलाई राखेसँगै साफले प्रतियोगिता स्थलको अनुगमन पनि गरेको थियो । साफले नेपालको प्रस्ताव स्वीकार गरेसँगै विराटनगरमा प्रतियोगिता हुने पनि पक्का भएको छ । नेपाल प्रतियोगितामा पहिलो उपाधि जित्ने दाउमा छ ।

भारतको सिलिगुडीमा भएको अघिल्लो संस्करणमा नेपालको यात्रा सेमिफाइनलमा रोकिएको थियो । नेपाल भारतसँग २-१ ले पराजित हुँदै घर फर्केको थियो । त्यसअघिको तीनै संस्करणमा नेपाल भारतसँग नै पराजित भएको थियो । नेपालले अहिलेसम्म सिनियर महिला फुटबलमा भारतलाई हराउन सकेको छैन ।

केहि साताअघि म्यानमारमा भएको ओलम्पिक छनोटको एसियाली क्षेत्रअन्तर्गत प्रारम्भिक चरणमा भने नेपालले भारतलाई १-१ को बराबरीमा रोकेको थियो । नेपाल उक्त प्रतियोगितामा अपराजित रहँदै दोस्रो चरणमा छनोट भएको छ । नेपालले उक्त प्रतियोगितामा आयोजक म्यानमार र बंगलादेशसँग पनि १-१ को बराबरी खेलेको थियो ।