काठमाडौं (हाम्रो खेलकुद) – नेपाली राष्ट्रिय पुरुष फुटबल टोलीले चिनियाँ क्लब ग्वान्झाउ आर एण्ड एफसँगमैत्रीपूर्ण खेल खेल्ने भएको छ ।

अखिल नेपाल फुटबल संघ (एन्फा) ले मंगलबार विज्ञप्ति जारी गर्दै चिनियाँ सुपर लिगमा प्रतिस्पर्धा गर्ने क्लबसँगको खेल पक्का गरेको हो । खेलको मिति तय नभएपनि सन् २०१९ जनवरीमा हुने एन्फाले जनाएको छ ।

नेपाली टोलीले केहि साताअघि बंगलादेशमा आयोजित बंगबन्धु गोल्डकप खेलेपछि अन्तर्राष्ट्रिय खेल खेलेको छैन । बंगबन्धुको समूह चरणबाट बाहिरिएको नेपालले साफ च्याम्पियनसिपमा सेमिफाइनल यात्रा तय गरेको थियो । नेपाल सेमिफाइनलमा माल्दिभ्ससँग ३-० ले पराजित भएको थियो ।

चीनबाट प्रतियोगिता समितिका अध्यक्ष याङ कि, टिम व्यवस्थापक हुआङ जुन र कार्यकरी समितिको लिआङ याजिङले एन्फा कम्प्लेक्स भ्रमण गरेका थिए ।  तीन सदस्य टोलीले एन्फा अध्यक्ष कर्मा छिरिङ शेर्पासँग खेलको तयारीबारे छलफल गरेका थिए ।  खेल आयोजनाका लागि भ्रमण टोलीले एन्फा कम्प्लेक्सको निरिक्षण पनि गरेको थियो ।

ग्वान्झाउ आर एण्ड एफ क्लब क्लब चीनको शीर्ष डिभिजन चिनिया सुपर लिगमा खेल्ने क्लब हो । गत साता सम्पन्न लिग सिजनमा ग्वान्झाउ १० औं स्थानमा रहेको थियो ।  क्लबमा सर्बियाली प्रशिक्षक ड्रागान स्टोकोभिच रहेका छन् ।