काठमाडौं (हाम्रो खेलकुद) – पल्सर सहिद स्मारक ए डिभिजन लिगअन्तर्गत बिहीबार अंक तालिकाको शीर्ष दुई स्थानमा रहेका रुस्लान थ्री स्टार र मनाङ मर्स्याङ्दी क्लब अामने-सामने हुँदैछन् । प्रतियोगिता सुरु हुँदा देखि नै उपाधिको बलियो दावेदार मानिएका दुई टोलीको प्रतिस्पर्धा रोमाञ्चक हुने अपेक्षा गरिएको छ ।

थ्री स्टारले लिगको पहिलो खेलमा फ्रेन्ड्स क्लबलाई २-१ ले पराजित गरेको थियो । उक्त खेलमा रन्जन विष्ट र बुद्ध चेम्जोङले १-१ गोल गरे । दोस्रो खेलमा थ्री स्टारले ब्रिगेड ब्वाइजलाई ५-१ को फराकिलो अन्तरले हरायो । त्यस खेलमा ५ फरक खेलाडीले गोल गरे । फरवार्ड रन्जनले लगातार दोस्रो खेलमा गोल गर्दा चोटबाट पुनरागमन गरेका विक्रम लामा, निराजन खड्का, सुनील बल र रन्जित धिमालले १-१ गोल गरे । थ्री स्टारले अंक तालिकाको शीर्ष स्थानमा रहँदै अाफूलाई बलियो दावेदारको रुपमा प्रस्तुत गरिरहेको छ ।

मनाङले पनि लिगको सुरुवाती दुवै खेलमा सहज जित दर्ता गरको छ । पहिलो खेलमा ब्रिगेड ब्वाइजलाई ३-१ ले पराजित गरेको मनाङले दोस्रो खेलमा एनआरटीलाई २-० ले पराजित गर्यो । दुवै खेलमा गोल गर्न सफल रहेका फरवार्ड ओलावाले आफिज भने थ्री स्टारविरुद्ध उपलब्ध रहने छैनन् । दुवै खेलमा पहेंलो कार्ड पाएका कारण उनी प्रतिबन्धमा परेका छन् । मनाङलाई चोटको समस्याले पनि उत्तिकै सताएको छ ।

उपकप्तान सुजल श्रेष्ठ एनआरटीसँग खेल्नुभन्दा २ दिन अगाडी प्रशिक्षणका क्रममा घाइते भए । उनलाई ठिक हुन अझै केहि साता लाग्ने बताइएको छ । मनाङले सुजल घाइते हुनुभन्दा एक दिन अगाडी मात्र प्रकाश बुढाथोकीलाई क्लबमा भित्र्याएको थियो । उनी एनआरटीविरुद्ध खेलको दोस्रो मिनेटमा काँधमा चोट बोक्दै बाहिरीए । उनको ‘क्लाभिकल बोन’ भाँचिएको छ र कम्तिमा ८ साता विश्राममा रहनुपर्ने डाक्टरले बताएका छन् ।

यता थ्री स्टारमा भने चोटको कुनै समस्या छैन । कप्तान विक्रम लामा ९ महिनाको विश्रामपछि ब्रिगेड ब्वाइजविरुद्ध टोलीमा फर्किए । उनले अन्तिम समयमा गोल गर्दै सुखद पुनरागमन पनि गरे । यसबाहेक टोलीमा निकै प्रतिस्पर्धा भने रहेको छ । पछिल्लो खेलमा विक्रम डिफेन्सको भूमिकामा थिए । प्रशिक्षक मेघराज केसीले मनाङविरुद्ध उनलाई कुन भूमिकामा खेलाउने प्रष्ट पारेका छैनन् ।

प्रशिक्षक मेघराज केसीले खेलको पूर्व सन्ध्यामा आयोजित पत्रकार सम्मेलनमा मनाङविरुद्धको खेल अन्य लिग खेलभन्दा फरक नरहेको बताए । ‘लिगमा जोसँग खेल्दा पनि ३ अंकको लागि नै खेल्ने हो । थ्री स्टार जुनै टोलीसँग खेल्दा पनि यसैको लागि खेल्छ । मनाङलाई पनि हामीले अन्य टोलीजस्तै ११ खेलाडी उतारेर खेल्ने हो,’ उनले भने । चोटका कारण मनाङ केहि कमजोर भएको हो भन्ने प्रश्नमा प्रशिक्षक केसीले त्यसलाई स्वीकार गरेनन् । ‘मनाङ भनेको लिग जित्न आएको टोली हो । लिग जित्न ११ खेलाडीले मात्र पुग्दैन । यो स्थिति मनाङ मात्र हैन अन्य क्लबमा पनि छ । क्लबमा विकल्पका रुपमा पनि स्तरीय खेलाडी छन्,’ उनले थपे ।

यता मनाङका प्रशिक्षक सुमन श्रेष्ठले चोटका कारण टोलीमा केहि समस्या हुने भने स्वीकारे । ‘हामीलाई उनीहरुको कमी त हुन्छ नै, तर विकल्पमा हामीसँग खेलाडी पर्याप्त छन् । हामीले यस खेलको लागि आफ्नो रणनीति पनि परिवर्तन गर्ने सोचेका छौं । उपाधि दावेदार टोली भएकाले अंक नगुमाउने हाम्रो लक्ष्य हुनेछ,’ उनले भने ।

यो पनि :

मनाङ विरुद्ध थ्री स्टार : जो पूर्व क्लबविरुद्ध खेल्दैछन्