काठमाडौं (हाम्रो खेलकुद) – अंक तालिकाको पुछारमा रहेका तीन टोली आज पल्सर सहिद स्मारक लिग अन्तर्गत पहिलो अंकको खोजीमा हुनेछन् । शनिबार लिग अन्तर्गत दुवै खेल हल्चोकस्थित एपीएफ रंगशालामा संचालन हुनेछ ।

पहिलो खेलमा फ्रेन्ड्स क्लबले सरस्वती युवा क्लबको सामना गर्नेछ । पहिलो खेलमा थ्री स्टारसँग २-१ ले पराजित फ्रेन्ड्स दोस्रो खेलमा एपीएफसँग १-० ले पराजित भएको थियो । दुवै खेलमा फ्रेन्ड्सले कडा चुनौती दिएको थियो । यता सरस्वती पनि दुवै खेलमा १-० को हार बेहोर्दै अंकविहिन छ । पहिलो खेलमा संकटाले अन्तिम मिनेटको गोलमा हराएको सरस्वतीलाई दोस्रो खेलमा हिमालयन शेर्पाले एक गोलले नै पराजित गरेको थियो ।

दोस्रो खेलमा अंकविहिन जावलाखेल युवा क्लबले अपराजित हिमालयन शेर्पा क्लबको सामना गर्दैछ । जावलाखेलले लिगको पहिलो खेलमा नेपाल पुलिस क्लबसँग १-० को हार बेहोर्यो । दोस्रो खेलमा विपक्षी संकटा अधिकांश समय १० खेलाडीमा सिमित हुँदापनि जावलाखेल २-० ले पराजित भएको थियो । अंक तालिकाको पुछारमा रहेको जावलाखेललाई सोहि स्थानमा राख्ने प्रयास शेर्पाको हुनेछ । पहिलो खेलमा एपीएफसँग गोलरहित बराबरी खेलेको शेर्पाले दोस्रो खेलमा सरस्वतीलाई १-० ले हराएको थियो ।

शनिबारका खेलहरु:

मंसिर ८ : फ्रेन्ड्स विरुद्ध सरस्वती – ११ बजे – एपीएफ रंगशाला

मंसिर ८ : जावलाखेल विरुद्ध हिमालयन शेर्पा – २:३० बजे – एपीएफ रंगशाला