काठमाडौं (हाम्रो खेलकुद) – साविक विजेता नेपाल एपीएफ क्लब र आयोजक त्रिभुवन आर्मी क्लब प्रधान सेनापति छैटौं अन्तर्राष्ट्रिय महिला फुटबल प्रतियोगिता २०७५ को फाइनलमा पुगेका छन् । सोमबार भएको सेमीफाइनलमा आर्मीले प्रदेश२ तथा एपीएफले नेपाल पुलिस क्लबलाई पराजित गरेको हो ।

भद्रकालीस्थित सेनाको मुख्यालयमा आर्मीले प्रदेश २ लाई ४-० ले पराजित गर्यो । आर्मीको जितमा कृष्णा खत्री, इन्दिरा राई, शर्मिला थापा मगर र सपना लामाले गोल गरे । आर्मीलाई कप्तान कृष्णा खत्रीले ३७ औं मिनेटमा सुरुवाती अग्रता दिलाएकी थिइन् ।

दोस्रो हाफमा आर्मीले ३ गोल थप्यो । कृष्णा खत्रीलाई पेनाल्टी क्षेत्रभित्र लडाएपछि प्राप्त पेनाल्टीमा इन्दिराले गोल गरिन् । शर्मिलाले ५८ औं मिनेटमा गोल गर्दै ३ गोलको अग्रता दिलाइन । वैकल्पिक खेलाडीको रुपमा मैदान प्रवेश गरेकी सपना लामाले ६७ औं मिनेटमा गोल गर्दै आर्मीको जित सुनिश्चित गरिन् । खेलको म्यान अफ द म्याच घोषित आर्मीकी दिपा राईले ५ हजार रुपैयाँ प्राप्त गरिन् ।

त्यसअघि एपीएफले सावित्रा भण्डारीको २ तथा प्लेयर अफ द म्याच अनिता बस्नेतको एक गोलको मदतले ३-० को जित दर्ता गर्यो । एपीएफले पहिलो हाफको ‌३५ अौं मिनेटमा अग्रता लिएको थियो । सावित्रा भण्डारीले अनिता बस्नेतको पासलाई सदुपयोग गर्दै गोल गरेकी थिइन् ।

दोस्रो हाफमा एपीएफले दुई गोल थप्यो । अनिता बस्नेतले ६९ अौं मिनेटमा पेनाल्टी क्षेत्रको ठिक बाहिरबाट उत्कृष्ट गोल गरिन् । त्यसको एक मिनेटमै एपीएफले पेनाल्टी पायो । मोनिका पुलामी मगरले गोललाइन नजिक ह्यान्ड गरेपछि रेफ्री पदम भुजेलले सिधै रातो कार्ड देखाएका थिए । सावित्राले पेनाल्टीमा सहजै गोल गर्दै एपीएफको जित पक्का गरिन् । म्यान अफ द म्याच घोषित एपीएफकी अनिता बस्नेतले ५ हजार रुपैयाँ प्राप्त गरिन् ।