काठमाडौं (हाम्रो खेलकुद) – फुटबल खेलाडी सुमन सुवेदी असई (प्रहरी सहायक निरिक्षक) बाट सई (प्रहरी नायब निरक्षक) मा बढुवा भएका छन् । मसिर २० गते बढुवा भएका सुमनलाई सोमबार आयोजित कार्यक्रममा एआइजी धिरु बस्नेतले फुली लगाई दिएका थिए ।

फुटबल खेलाडीका रुपमा प्रहरीमा प्रवेश गरेका सुमनले पटक पटक बढुवा हुँदै १४ वर्षमा सई बनेका हुन् । उनी २०६२ को जेठमा पुलिसमा भर्ती भएका थिए । उनले फुटबलकै कारण आफु यहाँ सम्म आउन सफल भएको सुमनले बताए ।

‘यति बेला परिवार, साथीभाई, नेपाल प्रहरी, प्रशिक्षक र समर्थकहरुलाई धन्यवाद दिन चाहन्छु,’रक्षक उनले भने, जसले मलाई लगातार साथ दिनु भयो र आज म यहाँ सम्म आउन सफल भएको छु ।’ २०६१ महावीर क्लबबाट ए डिभिजन लिग खेलेका ३२ वर्ष  सुमन अर्को वर्ष पुलिसमा आबद्ध भएका थिए । घुँडामा चोट लागेपछि पछिल्लो दुई वर्षयता भने उनी मैदान बाहिर छन् ।

उनले मैदान फर्कन प्रयास गरिरहेको समेत बताएका छन् ।’ चोट ठिक भइसकेको छ । अभ्यास पनि थालिसकेको छु,’ उनले भने, ‘अब फिट हुने कोशिस गरेको छु । विश्वास छ फेरि फुटबलमा फर्कने छु ।’ राष्ट्रिय टोलीबाट ११ क्याप जितेका सुमन धरानका स्थायी बासिन्दा हुन् ।

पुलिसले २०६३ देखि लागतार तीन पटक सहिद स्मारक ए डिभिजन लिग र २०६८ मा राष्ट्रिय लिग जित्दा सुमन टोलीका महत्वपूर्ण सदस्य रहेका थिए । उनले पुलिसबाट देश भित्रका अधिकांश नकआउट प्रतियोगिता जितेका छन् ।