काठमाडौं (हाम्रो खेलकुद) – पल्सर सहिद स्मारक ए डिभिजन लिग अन्तर्गत मंगलबार मछिन्द्र क्लब र नेपाल एपीएफ क्लबको खेलमा खेलाडी सुचिमा नाम नभएका खेलाडी मैदान उत्रिए ।

मछिन्द्रले खेलाडी सुचिमा नाम नभएका मिडफिल्डर विवेक पण्डितलाई वैकल्पिक खेलाडीका रुपमा मैदानमा छिराएको थियो । खेलको ६१ औं मिनेटमा विकास राईको स्थानमा उनी मैदान प्रवेश गरेका थिए । विवेक मैदान छिरेको एक मिनेटपछि नै रेफ्रीले उक्त गल्ति थाहा पाएपछि उनलाई मैदानबाहिर निकाले र फोर्थ अफिसियल बेन्चमा लागे ।

मैदानका अफिसियल र मछिन्द्रका अफिसियलबीच केहिबेर छलफल पछि दुवै तर्फबाट गल्ति भएको निष्कर्ष निस्कियो । ५ मिनेटसम्म मछिन्द्र १० खेलाडीमा सिमित भयो । ६७ औं मिनेटमा संजिव अर्याल मैदान प्रवेश गरे । एन्फाले औपचारिक म्याच रिपोर्टमा भने विकास राई र संजिव अर्याल खेलाडी परिवर्तन भएको देखाएको छ ।

वैकल्पिक खेलाडीमा समेत नाम नभएका खेलाडी बेन्चमा पनि बस्न पाउनु हुँदैन । तर विवेकले टोलीको वार्म अपदेखि खेल दौरान बेन्चमा बस्ने मात्र हैन मैदान प्रवेश गरेर एक मिनेट खेले पनि । फितलो लिग व्यवस्थापनका कारण टिम बेन्चमा बस्ने खेलाडी र अफिसियलबारे एन्फाले बिरलै हेक्का पुर्याउँदै आएको छ ।

खेलका म्याच कमिस्नर एन्फाका उपाध्यक्ष समेत रहेका कृष्ण थापा रहेका थिए । उनलेछिट्टै यसबारे विस्तृत छानबिन हुने बताए । ‘सेक्युरिटी र क्लबको गल्तीमा यस्तो हुन गएको हो । हामीले थाहा पाउने बित्तिकै उक्त खेलाडीलाई मैदान र प्लेईङ बक्सबाट निकालेर प्याराफिटमा पठायौ । त्यसपछि प्लेइङको खेलाडी मैदान पठायौ,’ उनले थपे,’ कारवाहीको विषयमा खेलाडी कसरी प्लेइङ बक्समा गयो भन्ने विषयमा अध्ययन गरिनेछ । रेफ्रि, फोर्थ अफिसयल र जनरल को-अर्डिनेटरबीच छलफलपछि निष्कर्ष निकाल्नेछौं ।’

सामान्यतया खेलमा दर्ता नगरिएका खेलाडीलाई मैदान उतार्दा त्यसो गर्ने टोलीलाई ३-० को हार र अन्य आर्थिक कारवाही गरिने प्रावधान छ । अन्तर्राष्ट्रिय फुटबलमा बेलाबेलामा दुई पहेंलो कार्ड पाएपछि खेलाडी प्रतिबन्ध हुँदा पनि खेलेको अवस्था धेरैपटक दोहोरिएको छ । तर खेलाडी सुचिमा दर्ता नभएको नाम नै मैदानमा उत्रँदा प्रतियोगिता नियमावलीमा उल्लेख भएअनुसार कारवाही हुनेछ । यदि त्यसो पनि नभएको अवस्थामा फिफाको नियम लागु हुने प्रावधान रहेको छ ।

क्लबका प्रशिक्षक रहेका निशान श्रेष्ठले भने आफूले उनलाई खेलाडी सुचिमा राखेको तर लेख्ने मान्छेले गल्ति गरेको भन्दै पन्छिए । सहिद स्मारक ए डिभिजन लिगका निर्देशक संजिव मिश्रले आफू यस विषयबारे जानकार नरहेको र छिट्टै यसबारे बुझेर निर्णय लिइने जानकारी दिए ।