काठमाडौं (हाम्रो खेलकुद) – मनाङ मर्स्याङदी क्लब मिडफिल्डर पुजन उपरकोटीले संकटाविरुद्धको जितमा गरेको गोल र त्यसको नतिजामा क्लबले जितेको लिग उपाधि आफ्नो दिवंगत बोजुलाई समर्पित गरेका छन् ।
मिडफिल्डर पुजनकी बोजुको केहि दिन अघिमात्र स्वोर्गरोहण भएको थियो । पुजनले संकटाविरुद्ध गरेको गोल आफ्नी बोजुलाई समर्पित गरेको हाम्रो खेलकुदलाई बताए । ‘ मेरो गोल र यो उपाधि दिवंगत बोजुलाई समर्पण गर्न चाहन्छु । गोल गर्नेबितिक्कै मैले वहाँलाई सम्झिएँ र गोल वहाँलाई समर्पण गरें,’ पुजनले भने, ‘ लिगको लागि निकै मिहिनेत गरेका थियौं । अहिले सबै मिहिनेतको प्रतिफल उपाधि जितेर पाएका छौं ।’
पुजनले संकटाविरुद्ध वैकल्पिक खेलाडीका रुपमा मैदान प्रवेश गरेको पहिलो टचमा नै गोल गरेका थिए । उनले विशाल राईको कर्नरलाई हेडरमार्फत गोलमा परिणत गरेका थिए । ८० औं मिनेटमा सुजल श्रेष्ठको स्थानमा मैदान छिरेका पुजनले ८१ औं मिनेटमा नै गोल गरेका थिए ।
पुजनले गत सिजन च्यासल युवा क्लबबाट बि डिभिजन खेलेका थिए । उनले च्यासललाई ए डिभिजनमा बढुवा गराउन महत्त्वपूर्ण भूमिका खेलेका थिए । उनले यस सिजन मनाङका लागि ११ मध्ये ८ खेल खेलेका छन् । यो उनको ए डिभिजन लिगमा पहिलो गोल पनि हो ।
पुजनले पारीवारिक कार्य अझै बाँकी रहेका कारण शुक्रबार नै गृहजिल्ला झापा फर्कने जनाएका छन् । उनले मनाङको लिग उपाधिमा आफ्नो भूमिका निर्वाह गर्न पाउँदा खुसी व्यक्त गरे ।
