काठमाडौं (हाम्रो खेलकुद) – चार जिल्ला फुटबल संघ (काठमाडौं, ललितपुर, भक्तपुर र धादिङ) ले नेपालमा आयोजना भएको एएफसी यु–१६ महिला फुटबल च्याम्पियनसिप छनोट प्रतियोगिता दौरान अखिल नेपाल फुटबल संघ (एन्फा) का पदाधिकारीले भ्रष्टाचार गरेको आरोप लगाएका छन् ।

प्रतियोगिता सेप्टेम्बर महिनाको तेस्रो साता नेपालमा आयोजना भएको थियो । चार जिल्ला फुटबल संघले बिहिबार एक प्रेस विज्ञप्ति जारी गर्दै प्रतियोगिता दौरान एन्फाका कर्मचारीले होटलको बीलको नाममा रहेको ९ लाख ६० हजार र १ लाख ३८ हजार रकम हिनामिना गरेको आरोप लगाएको हो ।

‘होटेल भ्यू भृकुटी गोदावरीबाट सनराइज बैंकको सातदोबाटो शाखाबाट (चेक नं ०००६०४५५७५) प्राप्त रकम ९ लाख ६० हजार र १ लाख ३८ हजार रकम एन्फाको खातामा नबुझाई सो रकम एन्फाका कर्मचारी राजेश श्रेष्ठबाट झिकी कोषाध्यक्ष रविन्द्रमान जोशीलाई बुझाएको देखिन्छ । त्यसमध्येबाट केही रकम एन्फाको निर्वाचनमा तिर्नुपर्ने बाँकी र आपसमा पदाधिकारीहरु बीचमा बाडेर खाएको देखिन्छ ।’ चार जिल्ला संघका अध्यक्षले हस्ताक्षर गरेको विज्ञप्तिमा उल्लेख छ । एन्फा अध्यक्ष कर्माछिरिङ शेर्पा जानकार रहेकाले यसबारे छानविन हुनुपर्ने चार जिल्ला संघले माग गरेको छ ।

विज्ञप्तिमा एएफसीले प्रतियोगिता आयोजना गर्नका निमित्त एकमुष्ट रकम दिएपनि एन्फाले होटेलसँग आपसी समझदारी गरी लाग्ने रकम भन्दा बढीको बिल बनाएर एन्फालाई रकम दिने सर्तमा सम्झौता गरेर तिर्दै आएको देखिन्छ । सोही अनुसार होटेल ग्राण्डीबाट रकम एन्फाको खातामा जम्मा भएपनि भ्यु भृकुटीको रकम त्यसरी जम्मा हुन नआउदा आर्थिक अनियमितता भएको विज्ञप्तिमा उल्लेख छ ।

यस्तै चार जिल्लाले प्रतियोगिताको दौरान एएफसीबाट खेलाडीलाई आउने ७८ डलरमा ४५ डलर खर्च गरेर ३३ डलर बढी ठगी गरेको समेत आरोप समेत लगाएको छ ।