एजेन्सी – म्यानचेस्टर सिटीले लिग कप फुटबलअन्तर्गत सेमिफाइनलको पहिलो लेगमा बर्टन आल्बियनलाई ९-० को फराकिलो अन्तरले पराजित गरेको छ । फराकिलो जितमा फरवार्ड गाब्रिएल जेसस एक्लैले ४ गोल गरेपछि सिटी प्रतियोगिताको फाइनलमा पुग्ने पनि लगभग पक्का भएको छ ।
सिटीको जितमा केभिन डे ब्रुएनले खेलको पाँचौ मिनेटमा हेडरमार्फत गोल गर्दै अग्रता दिलाएका थिए । ३० औं मिनेटमा ग्याब्रिएल जेससले ६ यार्ड बक्सबाट हेडर गोल गर्दै अग्रता दोब्बर पारे । चार मिनेटपछि जेससले नै अग्रता बढाए । पहिलो हाफको अन्त्य नजिकिंदै गर्दा ओलेक्जान्डर जिन्चेन्कोले चौथो गोल थपे ।
दोस्रो हाफको ५७ औं मिनेटमा जेससले हेडरमार्फत नै गोल गर्दै ह्याट्रिक पूरा गरे । ६२ औं मिनेटमा वैकल्पिक खेलाडी फिल फोडेनले गोल गर्दा त्यसको तीन मिनेटमा जेससले आफ्नो चौथो गोल थपे । ७० औं मिनेटमा काइल वाल्करले पनि गोल गर्दै स्कोर ८-० पुर्याए । खेलको ७ मिनेट समय बाँकी रहँदा रियाद माहरेजले ९-० को जित पक्का गरे ।
सिटीले पछिल्लो ६ सिजनमा ४ पटक प्रतियोगिताको फाइनल यात्रा तय गरेको छ । प्रतियोगिताको साविक विजेता समेत रहेको सिटीले अब चेल्सी र टोटेनहमबिचको खेलको विजेतासँग खेल्नेछ । पहिलो लेगमा टोटेनहम १-० ले अगाडी रहेको छ ।
