धनगढी (हाम्रो खेलकुद) – विदेशी खेलाडी अर्मान्ड मोएनले डेब्युमै ह्याट्रिक गरेपछि भ्याली च्यासल युवा क्लबले तेस्रो नेपाल अाइस सुदुरपश्चिम खप्तड गोल्डकपअन्तर्गत बिहिबार दिल्ली फुटबल क्लबलाई ६-० को फराकिलो अन्तरले पराजित गरेको छ ।यस जितसँगै च्यासलले प्रतियोगिताको क्वाटरफाइनलमा पुगेको छ ।

धनगढी रंगशालामा भएको एकपक्षीय खेलमा च्यासलले खेलको १४ अौं मिनेटमा अग्रता लिएको थियो । एल्भीसको पासमा सन्जोग राईले सहजै गोल गर्दै च्यासललाई अगाडि बढाए । १७ अौं मिनेटमा हेमन्तको कर्नरमा अर्मान्डको फ्लिकमा एल्भिसले सट प्रहार गर्न सकेनन् । लगत्तै सजिन थापामगरले किपर पोजिसनमा नहुँदा प्रहार दिल्लीका जसनले गोलको मुखबाट क्लियर गरे ।

३१ अौं मिनेटमा हेमन्त थापामगरले झन्डै २५ यार्ड टाढाबाट गरेको प्रहार क्रसबारको भित्री भागमा लाग्दै गोलमा परिणत भयो ।
पहिलो हाफको ५ मिनेट बाँकी रहँदा च्यासल ३-० ले अगाडी बढ्यो । सन्जोग राईको लामो पासलाई नियन्त्रणमा लिँदै अर्मान्डले पेनाल्टी क्षेत्रभित्रबाट गरेको शक्तिशाली प्रहारलाई गोलरक्षक मन्दिपले बचाउन सकेनन् ।

दोस्रो हाफमा पनि च्यासलले सुरुवातदेखि दवाव कायम राख्यो । ५६ अौं मिनेटमा विश्व अधिकारीले पेनाल्टी क्षेत्र बाहिरबाट गरेको प्रहारलाई गोलरक्षक मन्दिपले पन्च गरिदिए । ६१ अौं मिनेटमा अर्मान्ड मोएनले योगेश गुरुङको पासलाई सदुपयोग गर्दै च्यासललाई ४-० ले अगाडी बढाए । ६७ अौं मिनेटमा दिल्लीका शिवम पिछोरीको प्रहारलाई दिनेश थापामगरले उत्कृष्ट डाइभ दिँदै बचाए ।

७३ अौं मिनेटमा अर्मान्डले प्रहार गरेको फितलो प्रहार गोलरक्षकले रोक्न नसक्दा च्यासल ५-० ले अगाडी बढ्यो । इन्ज्युरी समयको पहिलो मिनेटमा सन्त बहादुर गुरुङले गोल गर्दै च्यासललाई ६-० को जित दिलाए । च्यासलले अब सेमिफाइनल प्रवेशका निम्ति रुस्लान थ्री स्टार क्लबसँग खेल्नेछ ।

पराजित टोलीका प्रशिक्षक बिएस मेहेराले पहिलो रोजाईका ६ खेलाडी उपलब्ध नहुँदा पराजित हुनुपरेको बताए । ‘हाम्रा ६ खेलाडी सन्तोष ट्रफीका लागि छनोट भएका कारण आउन पाएनन् । रिजर्भ टोलीका खेलाडी समेटेर टोली ल्याएका थियौं । सोचेअनुरुप सुरुवात नहुँदा फराकिलो हार बेहोर्नुपर्यो,’ उनले भने ।

च्यासलका प्रशिक्षक राजुकाजी शाक्यले नयाँ मैदान भएपनि डेब्यु गरेका फरवार्डले उत्कृष्ट प्रदर्शन गरेको बताए । ‘हामीले लिगमा राम्रो फरवार्ड नहुँदा निकै समस्या खेप्नुपर्यो । अर्मान्डले पहिलो खेलमा नै राम्रो प्रदर्शन गरे । अब डिफेन्समा केहि समस्या सुल्झाएर अर्को खेलको तयारी गर्नेछौं,’ शाक्यले भने ।

शुक्रबारको खेल :

गोर्खा ब्वाइज रुपन्देही विरुद्ध सीएमजी क्लब संकटा