धनगढी (हाम्रो खेलकुद) – नेपाली राष्ट्रिय टोलीका भरपर्दा डिफेन्डर अनन्त तामाङले पाटने क्लब रुस्लान थ्री स्टारबाट खेल्ने भएका छन् । अनन्त थ्री स्टारको टिमसँगै शनिबार खप्तड गोल्डकपका लागि धनगढी पुगेका छन् ।

अनन्त यसअघि थ्री स्टारमै आबद्ध रहेपनि सम्झौता बाँकी रहँदै मनाङ मस्र्याङ्दी क्लबसँग सम्झौता गरेका कारण उनी पल्सर सहिद स्मारक ‘ए’ डिभिजन लिग खेल्नबाट वञ्चित बनेका थिए । लिगको दुई चरणको खेल बाँकी रहँदा दुवै क्लबका पदाधिकारीहरुले थ्री स्टार र मनाङबाट बाँकी लिग नखेल्ने शर्तमा फुकुवा गरिदिएको थियो । तर, उनले लिगको दुई खेलका लागि कुनै पनि क्लबसँग अनुबन्ध भएनन् ।

अघिल्लो सिजन थ्री स्टारले मोफसलको विभिन्न प्रतियोगिताको उपाधि जित्दा उनी टिमको महत्वपूर्ण सदस्य रहेका थिए । लिगमा थ्री स्टार तेस्रो भएको थियो । थ्री स्टारका प्रशिक्षक मेघराज केसीले अनन्तकै अभावका कारण डिफेन्समा केही कमजोरी भएको बताएका थिए । मनाङ भने कीर्तिमानी आठौंपटक लिग च्याम्पियन बन्न सफल भयो ।

थ्री स्टारले खप्तड गोल्डकपको क्वाटरफाइनलमा ललितपुरको अर्काे क्लब भ्याली च्यासल युथ क्लबसँग प्रतिस्पर्धा गर्दैछ । यस खेलको विजेताले फाइनल प्रवेशका निम्ति मेची नेत्रालय काक्करभीट्टा फुटबल ट्रेनिङ सेन्टरसँग प्रतिस्पर्धा गर्नेछ ।