दिपक बोहोरा, पाँचथर
फिदिममा जारी दशौं रुस्लान फाल्गुनन्द गोल्डकपको उपाधिको लागी त्रिभुवन आर्मी क्लब र झापा ११ फुटबल क्लब तयार रहेको दुवै टिमका प्रशिक्षकहरुले जानकारी दिएका छन् । आज भएको पत्रकार भेटघाटमा दुबै प्रशिक्षकहरुले उपाधिको लागी तयार रहेको बताएका हुन् ।
सोमबार फिदिम माविको खेल मैदानमा उपाधिको लागी आर्मी र झापा प्रतिस्पर्धा गर्दैछन् । झापाले सेमिफाइनलमा ए डिभिजन क्लब सरस्वती युथलाई हराउँदै फाइनल प्रवेश गरेको हो । आर्मीले सेमिफाइनलमा रोयल फुटबल क्लब दार्जिलिङलाइ हराउदै झापासंगको उपाधि भिडन्त पक्का गरेको थियो ।
फाइनलको पूर्वसन्ध्यामा आयोजित पत्रकार सम्मेलनमा झापाका प्रशिक्षक प्रवेश कटुवालले उपाधिको लागी पाँचथर आएको बताए । आर्मी राम्रो टिम भएपनि आफ्नो टिममा अनुभवी खेलाडीहरु भएको हुँदा उपाधि जित्ने बताए । ‘पाँचथरको दर्शक र मैदानको साथ झापालाई रहने हुदाँ हामीलाइ उपाधिको लागि सहज हुनेछ, ’ कटुवाले भने ।
यता आर्मीका प्रशिक्षक गंगाराम देउजाले झापाली खेलाडीहरुको भन्दा आफ्नो टिमको टिमस्पिड राम्रो भएकोले उपाधि जित्ने दावी गरे । ‘हाम्रो युवा टोली भए पनि टिमवर्क र टिमस्पिड राम्रो भएकाले उपाधि हामी जत्नेछौं’ देउजाले भने ।
झापाका कप्तान कर्ण लिम्बुले आर्मीको टिमस्पिडलाई रोक्न झापाले टिकिटाका शैलीमा फुटबल खेल्दै उपाधिको लागी प्रतिस्पर्धा गर्ने बताए । आर्मीका कप्तान युद्ध शाहिले उपाधिको लागी मैदानमा अन्तिम समयसम्म प्रतिस्पर्धा गर्ने बताए ।
पूर्वकै प्रतिष्ठित फुटबल प्रतियोगिता फाल्गुनन्द गोल्डकपको दशौं संस्करणको विजेताले उपाधि सहित नगद चार लाख प्राप्त गर्ने छ । उपविजेताले दुई लाखमा चित्त बुझाउने छ । प्रतियोगिताको उत्कृष्ट एक जना खेलाडीले एक थान मोटरसाइकल प्राप्त गर्नेछन् ।
सोमबार हुने फाइनल खेल :
झापा ११ र त्रिभुवन आर्मी क्लब
