धनगढी (हाम्रो खेलकुद) – ललितपुरको पाटनस्थित दुई क्लब रुस्लान थ्री स्टार क्लब र भ्याली च्यासल युवा क्लब धनगढीमा जारी तेस्रो नेपाल आइस अन्तर्राष्ट्रिय सुदुरपश्चिम खप्तड गोल्डकपको तेस्रो क्वाटरफाइनलमा आमनेसामने हुँदैछन् । खेल धनगढी रंगशालामा दिउँसो २:३० बजे सुरु हुनेछ ।
च्यासलले यसअघि दिल्ली फुटबल क्लबलाई ६-० को फराकिलो अन्तरले पराजित गर्दै क्वाटरफाइनलमा स्थान पक्का गरेको हो । उक्त खेलमा क्लबका लागि डेब्यु गरिरहेका फरवार्ड अर्मान्ड मोएनले ह्याट्रिक गरेका थिए । कमजोर दिल्ली टोलीविरुद्ध च्यासलले दुवै हाफमा ३-३ गोल गरेको थियो । पछिल्लो खेलमा अनुपस्थित रहेका च्यासलका कप्तान देवेन्द्र तामाङ यस खेलमा पनि उपस्थित नहुने सम्भावना प्रबल छ ।
राजधानीमा गतसाता सम्पन्न सहिद स्मारक ए डिभिजन लिगमा तेस्रो स्थान हासिल गरेको रुस्लान थ्री स्टारले टोलीमा केहि परिवर्तन गरेको छ । दुई विदेशी खेलाडी पिटर सेगुन र अजयी मार्टिन्स धनगढी आएका छैनन् । जावलाखेलका दुई विदेशी खेलाडीलाई थ्री स्टारले टोलीमा समेटेको छ । यसबाहेक डिफेन्डर अनन्त तामाङ पनि टोलीमा जोडिएका छन् ।
यस खेलमा जित हात पार्ने टोलीले सेमिफाइनलमा मेची नेत्रालय काक्करभीट्टा फुटबल ट्रेनिङ सेन्टरको सामना गर्नेछ । मोफसलकै सर्वाधिक धनराशी पुरस्कार भएको प्रतियोगिताको विजेताले २१ लाख रुपैयाँ प्राप्त गर्नेछन् । उपविजेताले १० लाख प्राप्त गर्दा व्यक्तिगत विधाको विजेताले १५-१५ हजार रुपैयाँ पाउनेछन् ।
