काठमाडौं (हाम्रो खेलकुद)– अखिल नेपाल फुटबल संघ (एन्फा) ले महिला राष्ट्रिय फुटबल टोली र महिला यू १९ टोलीलाई नगद पुरस्कारसहित सम्मान गर्ने भएको छ ।

म्यानमारमा गत नोभेम्बरमा सम्पन्न ओलम्पिक छनोटमा दोस्रो चरणमा पुग्न सफल भएकाले महिला राष्ट्रिय फुटबल टोलीका हरेक सदस्यलाई ५० हजार रुपैयाँ दिने एन्फा कार्यसमितिको बैठकले आज निर्णय गरेको छ । त्यस्तै एएफसी यू १९ महिला च्याम्पियनसिपको दोस्रो चरणमा पुग्न सफल भएको युवा टोलीका सदस्यलाई जनही २५ हजार रुपैयाँ दिने एन्फाले निर्णय गरेको छ ।

अर्को महिना विराटनगरमा आयोजना हुने महिला साफ च्याम्पियनसिपको प्रशिक्षणमा रहेका ३० खेलाडीलाई पनि एन्फाले जनही १० हजार रुपैयाँ दिने भएको छ । पहिलो सहभागितामै नेपाली टोली टोकियो ओलम्पिक (सन २०२०) को महिला फुटबलअन्तर्गत एसियाको प्रारम्भिक छनोट चरण पार गर्न सफल भएको थियो ।

कार्तिक अन्तिममा म्यानम्यारमा भएको छनोट चरण पार गर्दै नेपाली टोली अघिल्लो चरण पुग्न सफल भएको थियो । छनोटको समूह ‘सी’ मा रहेको नेपाल समूहमा अपराजित अघिल्लो चरण पुग्न सफल भएको थियो । नेपालले भारत, म्यानमार र बंगलादेशसँग समान १–१ गोलको बराबरी खेलेको थियो ।

नेपाल उत्कृष्ट तेस्रो टोलीको रुपमा दोस्रो चरणमा प्रवेश गर्न सफल भएको थियो । उक्त समूहबाट समूहबाट म्यानमार समूह विजेता तथा भारत समूह उपविजेताको रुपमा दोस्रो चरणमा प्रवेश गर्न सफल भएका थिए ।