काठमाडौं (हाम्रो खेलकुद)– निर्वाचनमा आर्थिक अनियमितता भएको आरोप लगाउने चार जिल्लाका अध्यक्षका विषयमा छानविन गरि निर्णय लिन अखिल नेपाल फुटबल संघ (एन्फा) ले अनुशासन समितिलाई निर्देशन दिएको छ ।

वैशाखमा भएको निर्वाचनमा आर्थिक अनियमित भएको भन्दै एन्फा अन्तर्गत काठमाडौंका अध्यक्ष विराटजंग शाही, भक्तपुरका गौतम सुजखु, ललिपुरका पुरुषोत्तम थापा र धादिङका दीपक खतिवडाले संयुक्त रुपमा पत्रकार सम्मेलन गर्दै छानविनका लागि युवा तथा खेलकुद मन्त्रालय र राष्ट्रिय खेलकुद परिषद् (राखेप) सँग माग गरेका थिए ।

गत महिना एक सातामा दुई पटक पत्रकार सम्मेलन गर्दै ४ अध्यक्षले १४ बुँदे आरोप लगाएका थिए । एन्फाले चित्त नबुझेको विषयमा छलफल गर्न र आफ्नो राय राख्न पाउने प्रावधान हुँदा हुँदै पत्रकार सम्मेलन गरि सत्यतथ्य हिन अव्यवहारिक लानछाना लगाएको भन्दै छानविन अघि बढाउने बिहीबारको केन्द्रिय समितिको बैठकमा निर्णय गरेको हो ।

वैशाख २२ गते भएको निर्वाचनका दौरान एन्फा अध्यक्ष कर्मा छिरिङको प्यानेलले आर्थिक अनियमिता गरेको भन्दै ४ जिल्ला संघले संयुक्त रुपमा अडियो टेप सार्वजनिक गरेका थिए । एन्फाले आफ्ना निर्णय र अन्य विशेषमा जानकारी दिन शुक्रबार पत्रकार सम्मेलन राखेको छ ।