एजेन्सी – आर्सनलका स्पेनिस डिफेन्डर हेक्टर बेलेरिनले यो सिजनको बाँकी सबै सबै खेल गुमाउने पक्का भएको छ ।
प्रिमियर लिग अन्तरगत शनिबार चेल्सीविरुद्ध २–० को जित निकालेको खेलमा बेलेरिनले दोस्रो हाफमा चोट बोक्दै मैदान छाडेका थिए ।
उनको बाँया खुट्टामा एन्टेरियर क्रुसिएट लिगामेन्टमा समस्या देखिएको थियो । खेलको ७२औं मिनेटमा चोट बोकेपछि उनको स्थानमा मोहमेद इलनिनी मैदान छिरेका थिए ।
एमआरई परिक्षणबाट उनले यो सिजनका बाँकी सबै खेल गुमाउने क्लबले जनाएको छ । आर्सनलका प्रशिक्षक युनाइ इम्रीले उनले चोट बोक्दाको क्षण नै खराब रहेको र दुई दिनपछि उनको चोटबारे विस्तृत थाहा हुने बताएका थिए । यद्यपी उनको चोट निकै जटिल भएकाले कम्तिमा ६ महिना विश्राम गर्नुपर्ने चिकित्सकले जनाएका छन् ।
