लन्डन (एजेन्सी)– अल्भारो मोराटा चेल्सीबाट लोनमा एट्लेटिको म्याड्रिड जाने भएका छन् । सम्झौता यो सिजनको अन्त्यसम्म रहनेछ । त्यसपछि ला लिगा टोलीसँग उनलाई किन्ने विकल्प पनि रहनेछ ।
मोराटाको परिवार आइतबार नै म्याड्रिड पुगिसकेको छन् भने उनी पनि सोमबार पुग्ने अनुमान गरिएको छ । २६ वषे फरवार्डले आइतबार गेटाफेविरुद्ध नयाँ क्लबका लागि डेब्यू गर्ने सम्भावना रहेको बताएको छ ।
एसी मिलानबाट गोन्जालो हिगुइन चेल्सी जाने पक्का भएपछि मोराटाको बर्हिगमन निश्चित भएको छ । हिगुइन युभेन्ट्सबाट यसै सिजन एसी मिलान पुगेका थिए ।
मोराटा जुलाई २०१७ मा पाँच वर्षको सम्झौतामा रियल म्याड्रिडबाट चेल्सी पुगेका थिए । चेल्सीमा पहिलो सिजनको ८ खेलमा ७ गोल गर्दै उत्कृष्ट सुरुवात गरेपनि त्यसपछि भने उनको प्रदर्शन कमजोर रहँदै गएको थियो । बाँकी सिजन उनी संघर्षरत रहे । उनले पुरा सिजनमा ११ गोल मात्र गर्न सकेका थिए ।
यो सिजन पनि उनले सबै खाले प्रतियोगितामा गरि ९ गोल गरेका छन् । जनवरीमा नटिंघम फरेस्टलाई २–० ले हराउँदा दुवै गोल गरेका थिए । मोराटाले अब चेल्सीका पूर्व फरवार्ड डिएगो कोस्टासँग सहकार्य गर्नेछन् ।
