एजेन्सी – स्पेनिस ला लिगाको शीर्षस्थानमा रहेको बार्सिलोनाले घानाका मिडफिल्डर केभीन प्रिन्स बोटेङलाई लोनमा अनुबन्ध गरेको छ । उनी प्रारम्भिक सम्झौताअनुसार यस सिजनको अन्त्यसम्म लोनमा बस्ने र बार्सिलोनासँग खरिदको विकल्प पनि रहेको बताइएको छ ।
व्यवसायिक करिअरमा युरोपका ठूला लिगको अनुभव बोकेका बोटेङ पछिल्लो समय इटालीको सासुओलोबाट खेलिरहेका थिए । उनले त्यसअघि स्पेनिस लिगमा लास पाल्मासबाट खेलेका थिए । उनले इटालीको एसी मिलान, जर्मनीको साल्का र फ्रान्कफर्ट तथा प्रिमियर लिगमा पोर्ट्समाउथ र टोटेनहम हट्सपरबाट पनि खेलेका छन् । ३१ वर्षीय फरवार्ड बोटेङलाई मंगलबार क्लबले पत्रकार सम्मेलन गर्दै सार्वजनिक गर्ने कार्यक्रम रहेको छ ।
जारी सिजन बोटेङले १५ खेलमा ५ गोल गरेका छन् । बार्सिलोनामा आक्रामक खेलाडीको कमी भएपछि क्लबले उनलाई रोजेको हो । पाको अल्कासेर बोरुसिया डर्टमुन्ड र मुनिर एल हदादी सेभिल्ला पुगेपछि क्लबले विकल्पको रुपमा बोटेङलाई भित्र्याएको हो ।
