एजेन्सी – क्याटलान क्लब बार्सिलोना स्पेनिस कोपा डेल रे फुटबलको पहिलो लेगमा ला लिगा प्रतिद्धन्द्धी सेभियासँग पराजित भएको छ । बार्सिलोना घरेलु टोलीसँग बुधबार राति २–० ले पराजित भएको हो ।
सेभियाका पाब्लो साराविया र विसाम विन यडरले गोल गरे । मुख्य खेलाडीहरु कप्तान लियोनेल मेस्सी, लुइस स्वारेज र फिलिपे कौटिन्होविना मैदान उत्रिएको बार्सिलोनाले खेलमा घरेलु टोलीलाई दवावमा राखेपनि गोल सेभियाको बलियो रक्षापङ्ति तोडन सकेन ।
प्रतिस्पर्धात्मक बनेको खेलको पहिलो हाफ गोलरहित बराबरीमा सकिएको थियो । तर, दोस्रो हाफमा सेभियाल दुई गोल गर्न सफल भयो । ५८औं मिनेटमा पाब्लो सारावियाले क्वीन्सी प्रोमिसको पासलाई सदुपयोग गर्दै घरेलु टोलीलाई १–० को अग्रता दिलाए । ७६औं मिनेटमाविसाम विन यडरल गोल गर्दै सेभियालाई २–० को जित दिलाए ।
बार्सिलोनाले दोस्रो हाफमा लुइस स्वारेज र फिलिपे कौटिन्होलाई मैदानमा पठाएपनि टोलीको हार टार्न सकेन । यो खेलमा भर्खर मात्र अनुबन्धित भएका केभिन प्रिन्स बोएटिङले पहिलो रोजाईमा खेलेपनि प्रभावशाली प्रदर्शन गर्न सकेन ।
जितसँगै सेभिया कोपा डेल रेको सेमिफाइनल नजिक पुगेको छ । दोस्रो लेगमा बार्सिलोनालाई रोक्न सके सेभिया अन्तिम चारमा प्रवेश गर्नेछ । बार्सिलोनालाई सेमिफाइनल पुग्न निश्चित जित आवश्यक छ । दोस्रो लेग अर्काे साता बार्सिलोनाको घरेलु मैदानमा हुनेछ ।
